ҚТЖ-ға қарасты компанияларға қысқа дайын екендігі туралы куәлік берілді

«Қазақстан темір жолы» ұлттық компаниясының филиалы Магистральдық желі дирекциясы мен еншілес ұйымы «ҚТЖ-Жүк тасымалы» ЖШС шаруашылықтар мен кадрларының 2021-2022 жылдағы қыс маусымында жұмыс істеуге дайындығы туралы куәлік алды, деп хабарлайды Rail-news.kz.

Қатал маусым алдындағы емтихан іспеттес күзгі байқаудан сүрінбей өткенін растайтын құжатқа «ҚТЖ» ҰК» АҚ басқарма төрағасының бірінші орынбасары Қанат Әлмағамбетов пен «Қазақстандық салалық теміржол, автомобиль, әуе және су көлігі кәсіби одағы» ҚБ-нің төрағасы Оразғали Ахметбаев қол қойған.

Еске сала кетсек, қыс маусымындағы жұмысқа дайындықты ұйымдастыру үшін «Қазақстан темір жолы» ұлттық компаниясында штаб құрылған болатын. Осыған ұқсас штабтар құрылымдық бөлімшелер мен еншілес ұйымдарда, сондай-ақ, аймақтардағы жол бөлімшелерінде де ұйымдастырылып, оларға жергілікті теміржол мекемелерінің басшылары жетекшілік еткен. Компания бойынша биыл 187 шараны орындау және оларды қараша айының 1-не дейін аяқтау қарастырылған. Негізгі шаралар – жылжымалы құрамдарды, теміржолдар бойындағы қар тазалайтын және жинайтын техникаларды, өндірістік-техникалық ғимараттар мен қазандықтарды қысқа дайындау болды. Сонымен қатар алдағы қыста бірінші рет жұмысқа кіріскелі отырған мамандарды қатал маусымда жұмыс істеу тәсілдеріне оқытып, үйретіп және кадрларды жылы қысқы киімдермен, көмірмен қамтамасыз ету мақсат етілген. Міне, осы шаралар толықтай орындалып, талап үдесінен шыққан.

«Магистральдық желі дирекциясы бойынша қысқа қамданыс барысында 82 іс-шараны орындау қарастырылды. Биыл біздің филиал бойынша 1600-ге жуық «алғашқы қыстаушы» техникалық сабақтарға қатысып, оларға нұсқаулықтар жүргізілді, олар тәжірибелі мамандарға бекітілді. Ғимараттар ағымдық жөндеуден өтіп, қазандықтардың техникалық жай-күйі толық тексерілді. Әсіресе, қар тазалау техникалары айрықша назарға алынды. Олардың бірқатары деполық жөндеуден өтсе, екіншілері қызмет мерзімін ұзарта отырып, жөнделді. Жұмысшылардың арнайы қыстық аяқ киім және жылы киімдермен, жеке қорғану құралдарымен қамтамасыз етілуі де басшылық назарынан қалыс қалмады. Тұрмыстық-техникалық көмірдің жеткізілуінде де ешқандай мәселе туындаған жоқ. Бәрі бекітілген кестеге сай жүзеге асуда. Сондай-ақ, техникаларға, өзге де мұқтаждықтарға қажетті қысқы жанар-жағармай материалдары қоры жасалды», – дейді Магистральдық желі дирекциясы директорының орынбасары Бахытбек Алдажаров.

Ал «ҚТЖ-Жүк тасымалы» ЖШС алдағы қыс маусымына дайындық барысында локомотив шаруашылығына, соның ішінде әр локомотивтің техникалық, эстетикалық және өртке қарсы жағдайына айрықша назар аударған. Сондай-ақ, электржылжымалы құрамда түйіспелі сымның мұздануына қарсы күресетін вибропантографтар сияқты жабдықтардың қалтқысыз қызметі, тораптар мен жүйелерді қысқы режимге ауыстыруы қарастырылды. Сонымен қатар қазандықтарды дизель отынымен, вагон шаруашылығын тежегіш табандықтармен, материалдар және қосалқы бөлшектер қорымен, сигнал шамдарымен қамтамасыз ету жоспарға сай жүзеге асырылған. Темір тұлпардың оң қанатына биыл қыста бірінші рет отыратын машинистердің жанына тәжірибелі көмекшілері бекітілсе, сәйкесінше алғашқы қыстаушы-көмекшілер білікті машинистермен сапарға шығатын болады. Мұнда да көмір, жанар-жағармай қоры жасалған. Мінсіз әзірліктерімен ерекшеленген төрт филиал үш орынды өзара бөліскен. 1-орынды Семей ЖТ бөлімшесі иеленсе, 2-орынды Павлодар ЖТ бөлімшесі, ал 3-орынды Ақмола мен Шымкент бөлімшелері алды.

 

«Қазақстан темір жолы» газетінің тілшісі