Жарыс тұғырында – локомотившілер

Новости

11.08.2017, 11:13

Семейлік теміржолшылар кәсіби мереке құрметіне бөлімшеге қарасты 9 команда бақ сынаған мерекелік турнир өткізді. Мұндай ауқымды шара биыл алғаш рет ұйымдастырылып отыр. «Тойдың болғанынан боладысы қызық» демекші, алдағы уақытта оны дәстүрге айналдыру көзделуде. Бұл жайында бөлімше біріншілігінің салтанатты түрдегі ашылу рәсімінде спорт нұсқаушысы Наталья Мешкова айтып өтті. Осылайша жанкүйерлер делебесін қоздырған тамаша ойын ВЧД-23 және ЭЧ-18 командасының кездесуімен басталып та кетті. Жасыл алаңға тың құраммен шыққан электрмен қамту мекемесінің командасы қарсыласын ойсырата ұтты. Теміржолшылар сауатты ойнап қана қоймай, әдемі футбол комбинациясын ұйымдастырып, дүркін-дүркін шабуылға шығып отырды. Жігіттер бұл қарқынын тек финалдық ойынға шыққан сәтте, ТЧЭ-24 футболшыларымен болған ойында ғана жоғалтып алғандай еді. Себебі, кіл машинистерден тұратын аталмыш команданың алаң төріндегі айла-тәсілі мен шабуылды ұйымдастыру шеберлігі басым түсті. Бұл жолы футбол біріншілігінің ерекшелігі осыған дейін бөлімше чемпионы атанып жүрген Семей станциясы командасы финалда сүрініп, төртінші орынды місе тұтты. Мақтаулы футболшылар Алмас Жақсыбаев, Арсен Тастанов, Марат Игембаевтар барын салғанымен қарсыластары мығым ойнады. Есесіне Жаңасемей мен ЭЧ-18 ойыншылары тас-түйін қорғаныс құрып, оңай шағылатын жаңғақ еместіктерін танытты. Нәтижесінде жүлделі орындарды да аталмыш командалар бөлісті. Нақтырақ айтсақ, бірінші орын Семей локомотив пайдалану депосына, екінші орын Жаңасемей станциясына, ал үшінші орын Семей электрмен жабдықтау мекемесі командасына бұйырды. Осы ретте жасыл алаң төрінде жасындай жарқылдаған ТЧЭ-24 футболшыларының белсенділігін айта кеткен орынды. Команданың Қайрат Қасымжанов, Сергей Теплых сынды шебер шабуылшылары ұжым намысын үстем етіп, жеңіс туын желбіретті. Барлық жеңімпаздар арнайы кубокпен және құрмет қағаздарымен марапатталды.

Жарыс тұғырында – локомотившілер

Читайте также

Газета Қазақстан теміржолшысы, №55 от 21 июля 2026 года