Жолсеріктердің жаңа қонысы

Новости

01.08.2016, 10:40

Қаладан тысқары орналасқан, аумағы 6, 14 гектарды құрайтын аумақта орын тепкен жолаушылардың жаңа ғимараты алыстан көз тартады. Үш қабатты заманауи ғимаратта жұмысшы-қызметкерлер үшін барлық жағдай жасалған, киініп- шешінетін, жуынатын және ас ішетін бөлмелер, өзге де тұрмыстық қажеттіліктерге арналған бөлмелер жетерлік, конференц-зал да бар, барлығыбейнебақылау камераларымен, ауа баптағыш және өрт сөндіру құрылғыларымен жабдықталған. «Жолаушылар тасымалы» АҚ - «Батыс» филиалы Атырау телімінің бастығы Әлмұхан Есқалиевтің мәліметінше, Атырау теліміне қарасты 563 адам еңбек етеді, олардың 434-ін жолсеріктер құрайды. Қалғандары билет кассасының қызметкерлері, сатылған билетті есепке алатын бөлім және билет кассасы аппараттарына жауапты механиктер, тағысын тағылар. Олардың жұмыс орны Атырау темір жол вокзалында. –Жаңа ғимаратқа көшкелі жолсеріктеріміздің жаны кіріп қалды,сапардан келген-кеткен сайын олар туған уйлерінде жүргендей сезінеді. Өйткені, мұнда барлық қолайлы жағдай жасалған. Тіпті сапар алдында бір-екі сағат демалып алуға да болады.Бізде қызмет ететін жолсеріктердің көбісі Қазақстанның әр жерінен, тіпті кейбірі қатынап істейді. Сондықтан біз олардың жұмыс орнының жайлы болғанын қалар едік,- дейді телім бастығы. Сапарға аттанар алдында жолсеріктердің денсаулығын, қан қысымын тексеретін дәрігерлік пунктте ақ халаттылар кезекпен жұмыс істейді. Жолсеріктер сапарға шығар алдында олар нұсқаушы-инструктордың нұсқаулығын алады. Соңғы болып жатқан жағдайларға байланысты, егер пойыз үстінде күдікті жолаушы болса, дереу құзырлы орындарға хабарлап отыруы тиіс екендігі айтылуда. Мекемеде жолсеріктердің біліктілігін арттыру да жүйелі жолға қойылған. Аттестациялау кезінде олардың білімі мен білігі сынға түсіп, сынақтан сүрінбей өтіп, жоғары нәтиже көрсеткендерге жалақыларына үстеме ақша қосылады. Мәселен, бірінші деңгейге өткен жағдайда жолсеріктің жалақысына 11 мың теңге, екінші деңгейге өткенде 35 мың теңге қосылады. Алайда, егер жолсерік жұмысы барысында сөгіс алатын болса, оның деңгейі автоматты түрде бірінші деңгейге түсіп қалатын көрінеді. —Екі жылдың көлемінде билет құны өзгерген жоқ, тек былтыр ғана 10-ақ пайызға көтерілген болатын. Тарифті көтерудің де өзіндік себептері бар екені анық, себебі, өздеріңіз білесіздер, қажетті материалдар, қосалқы бөлшектер, жанар-жағармай, жолаушылар вагондарын ұстау және пайдалану қызметі бағалары қарқынды өсіп отыр. Оған вагондарды жөндеу, құрамдарды жаңарту секілді жұмыстарды қосыңыз.Жалпы, жолаушылар тасымалын жақсарту, мейлінше аз шығын жұмсау, технологиялық процестерді оңтайландыру үшін кешенді шаралар қабылдап жатырмыз. Біздің мақсатымыз – тасымалға деген сұранысты қанағаттандыру, жолаушыға сапалы қызмет көрсету, вагон паркін тиімді пайдалану,- деді телім бастығы тариф, билет бағасыжайлы сауалымызға орай. Бүгінде жолаушылар касса алдында сарсылып кезек күтіп тұрмай-ақ, өзіне-өзі қызмет көрсетудің транзакциялық терминалдары арқылы немесе интернет желісі арқылы билет сатып ала беретіні жолаушы тасымалының, кассалар жұмысын әлдеқайда жеңілдеткен. Сервистік қызметтің де түр-түрі көбейген. –«ҚТЖ» ҰК» АҚ тапсырмасына сәйкес, жолаушыларға сервистік қызмет көрсетуді дамыту мақсатында пойыздарды тағам өнімдерімен қамтамасыз ету үшін арнайы мекемелермен келісім-шартқа отырдық. Жол бойына ол мекемелер ұшақта көрсетілетін қызметтер ұсынып,ыстық тағамдар, сусындар мен тәттілер,тағы бірі әр түрлі сувенирлерді пойыз жолаушыларына ұсыну мүмкіндігіне ие. Жолсерікке де одан түсетін пайда бар, себебі сатылған өнімнің 15 пайызы жолсеріктің пайдасына есептеледі. Олардың барлығының да сертификаттары бар,- деді Әлмұхан Есқалиев сервистік қызметке қатысты соңғы жаңалықтарды түсіндіріп.

Жолсеріктердің жаңа қонысы

Читайте также

Газета Қазақстан теміржолшысы, №49 от 26 июня 2026 года