«Командама риза болдым...»

            Жуырда Қазақстан Ұлттық арнасының жобасы – «Білгірлер бәйгесіне» «Қазақстан темір жолы» компаниясының жастары қатысып, интеллектуалдық сайыста бақ сынағаны туралы жазғанбыз. Телешоу алдағы күндері Қазақстан телеарнасының сенбілік бағдарламасынан көрсетілмек.   «Қазтеміртранс» АҚ – Жүк вагондары операторы департаментінің менеджері  Мақсат Кеңесбаев «ҚТЖ тарландары» командасының топ басшысы болды. Біз команда капитанына  сайысқа қатысты бірнеше сауал қойған едік. – Мақсат, «Білгірлер бәйгесі» сайысына қатысу ұнады ма сізге, жалпы жоба жайлы кеңірек айтып беріңізші... –Ұлттық арнадан көрсетілетін аталмыш жобаның түсіріліміне сәуір айының аяғы мен мамыр айының басында қатыстық. Жалпы жобаның, яғни бағдарламаның мақсаты – әр түрлі жастағы қоғам  мүшелерінің ой-өрісін арттыру, бағдарлама арқылы түрлі саланы аудиторияға таныту болып табылады. Хабарға екі топ қатысады. Әр топтың бес мүшесі болады. Қатысушылар студенттер, оқушылар, түрлі мекеме қызметкерлері, мәселен банк, оқу орындары, халыққа қызмет көрсету орындарының жұмыскерлері бір-бірімен топ болып өзара сайысқа түседі. Жоба қонағы теміржолшылар болған бұл жолғы сайысқа ҚТЖ сынды алып компанияға қатысты мекемелер мен филиалдарда еңбек етіп жүрген, Қазақстанның түпкір-түпкірінен келген білікті мамандар қатысты. «Қазақстан темір  жолы»  ҰК-ның намысын арқалап, Венера Ахметова, Ақмарал Байғабылова, Алдаберген Кемпірбаев, Дастан Абылов сынды жалынды жастар «ҚТЖ тарландары» деген топ құрып бардық. Әр сала бойынша жан-жақты дайындалғандықтан, 32 команда бақ сынасқан сайыста 2 кезеңнен сүрінбей өтіп, ең үздік деген 8 команданың құрамына ендік. – Басты қарсыластарыңыз кімдер болды? – Қарсыластарымыз да осал болған жоқ.  «ҚазАгро» сынды компаниялардың қызметкерлері, Назарбаев, ҚазҰУ сынды оқу орындарының мамандары, «Болашақ» қауымдастығының мүшелерімен интеллектуалдық тур, видеосұрақ, қисынын тап, капитандар сайысы бойынша сынға түсіп, тарих тылсымы, аспан әлемі, ән мен күй, саясат сыры, техника тілі, жаратылыстану, кино және театр, салт-дәстүрге қатысты сұрақтарға жылдам әрі дұрыс жауап беріп, ширек финалға өттік. – Кімдер қолдау көрсетті? –«Қазақстан темір жолы» ұлттық компаниясы, жастар бастамасына қашан да қолдау көрсететін  «Қазтеміртранс» акционерлік қоғамы, кәсіподақ ұйымы, сондай-ақ, жалпы сайысқа қатысқан жас қызметкерлердің қай-қайсысы болсын еңбек ететін ұжым қолдаушымыз болды.  Жастар саясатын жүзеге асыру жолында жүйелі жұмыстар жүргізіп келе жатқан ҚТЖ-ның даңқын білетіндер өнерімізге қуана қол соқты. Тілектес болып, рухани демеу берген жанкүйерлерімізге алғыстан басқа айтарымыз жоқ. Сондай-ақ әр саланың мамандарын бір арнада «Білгірлер бәйгесінде» тоғыстырып, сайыстырған Ұлттық арна қызметкерлеріне, бізге жан-жақты қолдау көрсеткен ҚТЖ басшылығына  ризашылығымызды білдіреміз. – Команда капитаны болу қиын ба әлде оңай ма? –Оңай немесе қиын деп айтпай-ақ қояйын, бірақ жауапкершілік жүгі өзгелерден салмақты болған соң біраз «терлеуге» тура келгені рас. Бұл тұрғыда сайысқа барын салған команда мүшелері – әріптестеріме шексіз риза болдым... – «ҚТЖ тарландарын» алдағы уақытта да биіктерден көреміз деген үміттеміз? –Рахмет, бұйыртса... Жансая ШЫҢҒЫСХАНҚЫЗЫ