Алтынкөл: контейнерлік жүк ағымы артып келеді
Алматы облысына жұмыс сапары аясында ҚР Премьер-министрінің бірінші орынбасары Асқар Мамин «Қорғас- Шығыс қақпасы» АЭА және «Қорғас» ХШЫО нысандарын аралап, құрылыс жұмыстарының қарқыны жайлы «ҚТЖ» ҰК» АҚ жетекшісі Қанат Алпысбаевтың есебін тыңдады. Компания жетекшісінің мәліметінше, бүгінгі таңда жоспарланған 91 инфрақұрылымдық нысанның 74-і аяқталған, тағы 4 нысан бітуге жақын. Қазақстан – Қытай арасындағы екінші шекаралық теміржол өткелі болып табылатын Алтынкөл – Қорғас арқылы контейнерлік жүк ағымы оң динамикалық өсімге ие болуда. Және бұл жүк ағымының беталысы алдағы уақытта одан әрі күшейе түседі деп күтіліп отыр. Ол үшін ұлғайып келе жатқан жүк ағымының өтуін жеделдетуге барынша қолайлы жағдай жасалуы қажет. Алтынкөл станциясында ұлттық компанияның барлық құрылымдық бөлімшелері қызметкерлерінің қатысуымен өткен жиын барысында «ҚТЖ» ҰК» АҚ басшысы Қанат Алпысбаев осындай міндеттер қойды. Көрші Қытай елінде шығыс-батыс бағдары бойынша 5 мың контейнерлік пойыз бағыттау туралы бағдарлама бекітілгенін еске салып, Қазақстан сол транзиттің көп бөлігін өз аумағынан өткізу үшін бәсекелестік бойынша артықшылықтарын көрсетуі керек. Ал бұл жағынан негізгі рөл Алтынкөл станциясына тиесілі, деді компания жетекшісі. – Келесі жылға жоспарларымыз көп. Алтынкөл – Қорғас өткелі бойынша 1600 контейнерлік пойыз жіберу міндеті тұр. Біз осындай ғаламат жүк ағымын өткізуге дайын болуымыз қажет. Яғни, бұл қызметте сапа, қауіпсіздік, жүктердің сақталуы, бағдар бойынша бәсеке тарифтер жөнінен де жоғары нәтиже көрсете алуға тиіспіз, – деп атап өтті Қ. Алпысбаев. Компанияның Алтынкөл станциясы филиалының директоры Нұрым Жаниязов бұдан бұрын Достық станциясын басқарған, шекаралық өткелде жұмыс тәжірибесі бар басшы. Өз кезегінде станция басшысы 2012 жылдың 22 желтоқсанында ашылғалы бері Алтынкөл шекара станциясынан өткізілген экспорттық-импорттық жүктердің айналымы шамамен 5 миллион тонна болғандығына тоқталды. Айта кетейік, Ұлттық компанияға қарасты Достық және Алтынкөл екі халықаралық түйісу нүктесі арқылы биыл 10 айдың ішінде 812 контейнерлік пойыз жүріп өткен болса, соның 683-і Достық арқылы, 129-ы Алтынкөл арқылы өткізілген. Бұл нүкте арқылы өтетін пойыздардың негізгі бағыттары Еуропа, Орта Азия, Кавказ, Түркия елдері, сондай-ақ жүк көлемін арттыру бойынша жасалған жұмыстардың нәтижесінде 2016 жылы Парсы шығанағы мен Ауғанстанға бағыт алған контейнерлік пойыздар да болған. «ҚТЖ – Жүк тасымалы» АҚ вице-президенті Қайрат Сәуірбаевтың айтуынша, биыл өткен жылдың сәйкес кезеңімен салыстырғанда Қытайға экспортталатын жүктер көлемі артқаны байқалады: вагондар бойынша – 128 пайыз, тоннаж бойынша – 138 пайыз, транзиттің өсуі – 155 пайызды құраған. Отырыс барысында сонымен бірге Қорғас өзенінде жағалауды нығайту жұмыстарын жүргізу, темір жол, автомобиль инфрақұрылымын және «Қорғас» ХШЫО нысандарын сел тасқыны қаупінен қорғау туралы мәселелер көтерілді. Осы жылдың 20 қарашасына дейін Қытай тарапынан өзеннің сол жақ жағалауын бойлай қоршау қабырға салу жұмыстары аяқталады деп жоспарлануда. Қанат Қалиұлы Қорғас өзені арнасына қатысты болжап болмайтын жағдайлар орын алу қаупін ескере отырып, аталған жұмыстарды дер кезінде аяқтау қажеттілігін атап өтті. Компания басшысы, сонымен қоса теміржолшылар мен аралас құрылым қызметкерлерінің тұрғын үй және әлеуметтік мәселелерін шешуге назар аудартты. Ол Алтынкөл станциясы мен «Қорғас-Шығыс қақпасы» АЭА жұмысшыларына арналған тұрғын үй нысандары құрылысымен танысты. Бүгінгі таңда елді мекенде 2100-ден астам адам өмір сүруде. Ағымдағы жылдың қараша айында құрылысшылар 192 бөлмелік шағын отбасыларға арналған екі жатақхананы пайдалануға беруге уәде етті. Қазірде пәтерлерді жиһазбен, тұрмыстық техникамен жабдықтау жұмыстары жүргізілуде. Демек, ол пәтерлерде таяу уақытта қоныс тойларын тойлайтын күндер де алыс емес деп болжам жасауға болады.
Ирина БЕКТИЯРОВА, Қорғас