Атырау өңірінде биыл 92 шақырым жол жаңарады
Атырау облысы бойынша меншікті тілші
Биыл Атырау өңірінде күрделі жөндеу жұмыстары қарқынды жүруде. Жуырда Қиғаш – Д.Нұрпейісова – 3-разъезд аралығындағы жол жаңарды.
Атырау магистральдық желі бөлімшесінің бас инженері Амангелді Рахмеденовтің мәліметінше, жоспар бойынша 18,857 шақырым жол толықтай қайта салынған. Ескі темір жол құрылымы түгел алынып, орнына су жаңа темірбетонды шпалдар барлық технологиялық талаптар сақтала отырып төселген. Бұрынғы рельстердің ұзындығы 25 метрлік болып бунақталып салынатын болса, қазіргі уақытта тек түйіспесіз жолдар төселуде. Бұл дегеніміз болтқа, қапсырмаға деген шығынды әлдеқайда азайтады. Сонымен қатар Дина Нұрпейісова станциясы мен 3,4-бекеттердегі 5 ескі бұрма жаңасына ауыстырылды. Нәтижесінде телімде жол сапасы артып, пойыздар жылдамдығын жолаушылар пойызында 60км/ сағ-120км/сағатқа, жүк пойызында 50км/сағаттан 100км/сағатқа көтеруге ықпал етеді деген болжам жасалып отыр. Айта кетейік, аймақта биыл барлығы 92 шақырым жол жаңармақ.