Теміржолды күрделі жөндеуден өткізу бойынша жол картасы әзірленуде
«Қазақстан теміржолшысы» газетінің тілшісі
Алдағы жеті жылда 11 мың шақырым жол табанын сауықтыру көзделеді. Яғни, 2029 жылдың соңына дейін осынша теміржол учаскесін күрделі жөндеу жоспарланып отыр.
Келесі, 2023 жылдың өзінде 882 шақырым темір жолда түбегейлі сауықтыру жүргізіліп, күрделі жөндеуден өтетін болады. Бұл туралы Үкімет отырысында Индустрия және инфрақұрылымдық даму министрі Қайырбек Өскенбаев Президенттің сайлауалды бағдарламасы аясында іске асатын шараларды таныстырғанда мәлімдеді. Айтуынша, 2030 жылға дейінгі көлік-логистикалық әлеует тұжырымдамасының жобасы әзірленген. Бекіту мерзімі – жылдың соңына дейін.
– Инфрақұрылымдық теміржол жобалары іске асырылуда. «Достық – Мойынты» учаскесінің екінші жолдарының құрылысы биыл қараша айында басталды. Қалған жобалар бойынша техникалық құжаттама әзірленіп жатыр. Республикалық маңызы бар автожолдар мен жергілікті желіні салу және реконструкциялау жалғасуда. 2029 жылдың соңына дейін республикалық маңызы бар және жергілікті маңызы бар 22 мыңнан астам автожолдың құрылысы мен жол жөндеу жұмыстарымен қамту жоспарланып отыр, – деді Қайырбек Өскенбаев.
Үкімет жергілікті атқарушы органдармен бірлесіп, ірі қалаларда электромобильдер үшін қажетті инфрақұрылымды құру жөніндегі Жол картасын әзірлеуге кірісті.