Биыл 1401 шақырым теміржол жөндеуден өтеді

Алдағы бес жыл ішінде Қазақстанда он бір мың шақырым теміржол жөндеуден өтеді. Соның ішінде биылғы жазғыжол жұмыстары 1401 шақырымды қамтымақ. Оның 570 шақырымы күрделі жөндеу еншісінде. Бүгінгі таңда жол техникасын дайындау жұмыстары аяқталып, еліміздің оңтүстік өңірлерінде жол жөндеу жұмыстары басталған.

Жазғы жолды сауықтыру жұмыстарының үлкен көлемі Шу – Қандыағаш телімі бойынша 266 шақырымды, Астана – Алматы бойынша 260 км, Жаңа-Есіл – Көкшетау – 161 км, Ақтоғай – Семей-Алтай – 153 км, Қандыағаш – Ақсарай – 138 км, Алматы – Павлодар бойынша 106 км құрамақ.  

Өткен жылы жазғы-жол жұмыстары барысында еліміздің барлық өңірі қамтылған еді. Жалпы жұмыстар 1 443 км жол көлемінде орындалды, оның ішінде, 557 км жол күрделі жөндеуден өткен болатын. Әртүрлі жөндеу түрлерінен өтіп, жаңа келбетке ие болған телімдерде пойыздардың қозғалыс жылдамдығы артатынын атар едік. Мәселен, былтыр 581,4 шақырымда «Тальго» вагондары бар жолаушылар пойыздары үшін; 9 шақырымда электр пойыздары үшін; 656,6 км жолаушылар пойыздары үшін; 605,4 км жүк пойыздары үшін және 480,6 км контейнерлік пойыздар үшін жылдамдық өсті.  

Магистральдық желі дирекциясы мамандарының айтуынша, Компанияның инфрақұрылымды жаңғырту бойынша ауқымды жоспарларын жүзеге асырып жатқан еңбеккерлердің әлеуметтік-тұрмыстық жағдайын жасауға айрықша көңіл бөлініп отыр. Айталық, жол шаруашылығы қызметкерлерін санитарлық-тұрмыстық жағдаймен толыққанды қамтамасыз ету мақсатында 215 жылжымалы ғимарат қарастырылған. Былтыр соның 102 ғимараты орнатылса, 2024 жылы 139-ы, ал 2025 жылы 22 ғимарат орнатылмақ. Ал Әлеуметтік-тұрмыстық жағдайларды жақсарту және 2024 жылғы еңбекті ұйымдастыру деңгейін арттыру жөніндегі бағдарлама шеңберінде 93 ғимаратқа ағымдық жөндеу жүргізу жоспарланған.  

Сонымен қатар қолайлы еңбек жағдайларын жасау үшін жол дистанцияларының күшімен ғимараттарды – жылу жүйесін, шатырды және т.б. ағымдық жөндеуден өткізу жоспарланған, ол үшін 465 млн. теңгеден астам сомаға құрылыс материалдары сатып алынбақ.  

2025 жылы құрылыс-монтаждау жұмыстарын орындай отырып, Сай-Өтес станциясы бойынша ПЧ-12 Гараж және Қандыағаш станциясы бойынша ПЧ-6 Қандыағаштың компрессорлық ғимараттарын күрделі жөндеуден өткізуге арналған екі жобалау-сметалық құжаттаманы әзірлеу жоспарланған. Сондай-ақ, 2023 жылы арнайы жылжымалы құрамның 721 бірлігі әртүрлі жөндеу түрлерінен өтсе, биыл да жөндеу түрлерінен тағы 996 бірлігі өтпек. Атап өтетін жайт, «Жолаушылар тасымалы» АҚ-нан балансқа машиналарға ілесіп жүретін бригадаларға ыңғайланып қайта жабдықталған 57 класты вагон қабылданған. Осы жылы оның 18-іне күрделі жөндеу жүргізу қарастырылып отыр.