Еңбек өнімділігі артқан
Семей ЖТ бөлімшесінде еңбек өнімділігі бойынша бірқатар мәселелер алға қойылып отыр. Бөлімшенің өндірістік-техникалық бөлімінің мамандары өткен жылғы көрсеткіштерге сүйене отырып тың шешімдер қабылдауда.
Қызмет орындарындағы осыған дейінгі еңбек өнімділігі тиімді нәтижелер көрсетті. Мәселен, бір ғана тасымал процесіне қатысушы еңбеккерлер өнімділігі өткен жылы 103,2 пайызға артыпты. Бұл дегеніміз әр адамға шаққанда 3768,53 мың ткм нетто деген сөз. Бұған тасымал контингентін арттыру себеп болған.
Бөлімше бойынша биыл еңбек өнімділігін арттыру үшін қызмет орындарын автоматтандыру мәселесі жалғаса түспек. Атап айтсақ, желі бойындағы барлық жүк станцияларындағы автоматты басқару жүйесіне ФДУ-92 жинақ карточкасы енгізіліп жатыр. Өткен жылы қолға алынған бұл шара нәтижесінде 39 нысан «соңғы миля» жобасына қосылған. Оның ішінде класс санаты жоғары 10 станция мен еншілес мекемелер бар.
Мамандардың айтуынша, қағазсыз іс жүргізудің еңбек өнімділігін арттырудағы үлесі зор екендігі дәлелденді. Бұл ретте бөлімше бойынша Семей мен Жаңа-Семей станцияларындағы ДУ-3 журналдарына қозғалыс пен тыйым салу кестесін қағазсыз енгізуге арналған қанатқақты жоба өз нәтижесін беруде. Аталмыш бағыттағы атқарылып жатқан жұмыстар ендігі аралықта жиі сарапталмақ.
Қуаныш Қожаев, Семей