Логистикасы дамыған өңірде
Қазақстандағы үшінші мегополис Шымкент оңтүстіктегі ірі логистикалық орталыққа айналады деген болжам расқа айналып келеді. Жуырда мұнда аймақта бұрын-соңды болмаған, логистикалық бағытта көтерме тарату орталығы ашылды.
«GraMad» көтерме тарату орталығы әсіресе, жергілікті дихандар үшін аса тиімді болып отыр. Мұнда делдал қызметінсіз өндіруші өнімдері тікелей тұтынушыға ұсынылады. Орталықта көтерме, бөлшек сауда бар, авто және теміржол тұйығы жұмыс істейді. Жүк тиеген ірі фуралар емін-еркін кіріп шыға береді, теміржол вагондарымен де тасымалдау мүмкіндігі бар.
Аталған жоба «Бизнестің жол картасы-2020» мемлекеттік бағдарламасы шеңберінде қолдау тапты. Жалпы 3,5 млрд теңге жеке инвестиция құйылып, 200-ден аса жаңа жұмыс орнымен қамтылды. Мұның алдын Мемлекет басшысы Нұрсұлтан Назарбаев Үкіметтің кеңейтілген отырысында көтерме-тарату орталықтарының желісін дамытуды тапсырған болатын.
Орталықтың жалпы алаңы 11 мың шаршы метр. Оның ішінде сауда алаңы 3,5 мың шаршы метр, логистикалық қоймалар алаңы - 7 500 шаршы метр. «Бізден сатып ал» акциясы шеңберінде «Шымкент өнімдері» сауда алаңшасынан жергілікті өнімдерді сатып алуға болады. Себебі, бұл жерде тауарлар нарықтағы бағадан он пайыздай төмен ұсынылып отыр.
Жансая СЫДЫҚБАЙ, Шымкент
Суретті түсірген автор