Қар құрсауынан құтқарды
Наурыздың 5-нен 6-на қараған күні олтүстікте ұйытқып соққан қарлы боран барлық бағыттағы тасжолдарды жапты. Астанаға жақын Ерейментау учаскесіне теміржолшылар Астана мен Павлодар автожолында «қар тұтқынында» тұрып қалғандарға көмекке келді.
Азаматтық қорғаныс органдарымен бірлесе жедел шаралар қабылданды. Екібастұз жол дистанциясы мен электрмен жабдықтау дистанциясының қызметкерлері Ерейментау, Үленті жаққа аттандырылып, сыйымдылығы 30 адамдық КамАЗ, Газ -66 автокөліктері жұмылдырылды.
Қазіргі кезде «ҚТЖ» ҰК» АҚ барлық қызметтері ерекше жағдайда жұмыс істеуін жалғастыруда. Автожолдарда ұйытқи соққан боран мен көру мүмкіндігі шектелген жағдайда теміржолшылар пойыздардың үздіксіз қозғалысын қамтамасыз етіп келеді. Астана – Екібастұз учаскесінде түнде 50-ге тарта адам жолды қардан аршыды.
Толықтай алғанда, теміржол желісінде тәулік ішінде шамамен 1400 адам жұмыс істеп, 60 астам қар тазарту және қар аршу техникалары жұмылдырылды.
Жолдарды қардан тазарту жұмыстары тәулік бойы жүргізілуде.
Қызғалдақ ЖАҚЫПБЕКОВА