Электр желілерін мұздан тазартуда

Жаңалықтар

17.01.2017, 18:52

Ақтөбе облысы аумағында күн бір жылып, бір суып, ауа райының жиі алмасуынан жол бойындағы электр сымдарына қырау тұрып, мұз қатып жатыр. Электрмен жабдықтау дистанциялары электр желілеріне қатқан мұздарды түсірумен айналысуда. Біріктірілген Ақтөбе электрмен жабдықтау дистанциясының директоры Сәкен Орынбаевтың хабарлауына қарағанда, мекемеге қарасты Үйтас – Құдықтас станциялары аралығында мұздар түсірілген. – Күні кеше шамамен 22 км электр сымынан мұз түсірілді. Ал, бүгін 6-шы мен Қандыағаш станциясы аралығында шамамен 20 км сымнан мұз түсіріледі. Қыс кезінде дистанциялықтарды алаңдататын бір жұмыс осы. Күн райына байланысты әзірге кішкене мұздар қатып жатыр, егер оны дер кезінде түсіріп тастамаса, мұз ауырлай береді. Сәйкесінше, сымдарға салмақ түсіп, электр қызметінің сапасына кері әсер етуі мүмкін, – дейді дистанция директоры. Сәкен Орынбаевтың айтуынша, жол бойындағы электр сымдары жерден 8-10 метр биіктікте орнатылған. Сымдағы мұз арнайы бамбук таяқшасының көмегімен түсіріледі. Ұзындығы 10-11 метр болатын бамбук таяқшасын арнайы тапсырыспен ертерек алдыртып қояды. Осы күндері Сағыз станциясымен шектесетін аралықта да мұз қатқан. Электриктер енді солай қарай ойыспақ. –Жалпы, дистанцияның қызмет көрсететін аумағы 800 км құрайды. Айта кетейік, күннің бір жылып, бір салқындауына байланысты Шалқар мен Байғанин аудандары аумағында да сымдарға мұз қатып, ол кейбір жерлерде электр сапасына кері әсерін тигізіп жатыр. Мұндай жайт Ақтөбе облысымен шектес Қызылорда облысының Арал және Қазалы аудандарында да орын алып отыр деседі электр саласының мамандар.

Электр желілерін мұздан тазартуда

Басқа да жаңалықтар

Қазақстан теміржолшысы газеті, №78 02 қазан 2026 жыл