ҚТЖ-ның әлеуметтік пакеті биыл да бірқатар жеңілдіктерді қамтымақ
«Қазақстан теміржолшысы» газетінің тілшісі
Жақында компанияның кадр саясатына қатысты мамандар өткен жылғы жұмысын қорытындылады. Онда теміржолшылардың денсаулығын сақтау, әлеуметтік әл-ауқатын жақсарту бойынша қандай өзгерістер болып жатқаны белгілі болды, деп хабарлайды Rail-news.kz.
«ҚТЖ» ҰК» АҚ Адами ресурстарды басқару департаментінің бас менеджері Саян Сыздықовтың баяндамасы теміржолдағы медициналық сақтандыру мәселесін көтерді. Оның айтуынша, ЕМС – яғни ерікті медициналық сақтандыру бойынша келісімшарттар жасалған, теміржолшылар сол арқылы медициналық қызметтерді пайдалана алады.
Сонымен қатар ЕМС аясында бюджеттің бекітілген сомасы бойынша қолданыстағы сақтандыру пакеттерін жақсарту жұмыстары жүргізілді. Атап айтқанда, өндірістік персонал жұмысшылары үшін стоматологиялық емге арналған сома 5 мың теңгеге көбейтілді, тұмауға қарсы екпені жылына 1 рет салу қарастырылды, «Құрметті теміржолшы» белгісі бар жұмысшылардың ата-аналары үшін тегін тіркелу мерзімі 75 жасқа дейін ұзартылды, клиентке терапевт дәрігердің медициналық консультациясын қашықтан алуға мүмкіндік беретін «Телемедицина» қызметі қосылды.
Әлеуметтік жауапкершіліктен босату аясында персоналды Зейнетке ерте шығару бағдарламасын 894 жұмысшы пайдаланған, бұл бағыттағы жұмыстар биыл да жалғасын табады. Соңғы жылдары бірінші рет былтыр декреттік демалыста отырған әйелдерге 1 АЕК көлемінде бір реттік сыйақы төленді. Компанияда жұмысшыларға ұсынылатын әлеуметтік жеңілдіктер республика бойынша ауқымды төлемдердің қатарында.
Мәселен, бұған ҚТЖ жұмысшысының әлеуметтік пакеті «Самұрық-Қазына» АҚ-ның корпоративтік стандартында көрініс табатын классикалық жеңілдіктерден де, сонымен қатар басқа портфельді компанияларда жоқ арнайы жеңілдіктерден де тұрады.
Биыл бұл бағытта жұмыстар жалғасын тауып, жақын уақытта комиссия қарауына жұмысшыларды әлеуметтік қолдау бойынша нақты ұсыныстар енгізілмек. Атап айтқанда, кез келген жастағы балаларды асырап алуға материалдық көмек беру, жаңажылдық сыйлықтар алатын теміржолшылар балаларының жасын ұлғайту (14 жас), шалғай станциялардағы балаларды мектепке жеткізу мәселесін ұйымдастыру, т.т.
Жауапты маманның айтуынша, компанияда Тұрғын үй саясаты бойынша АЦУП (диспетчерлер) мамандарын көшіру кезінде қосымша жеңілдіктер енгізілді, соған қоса шақырылған жұмысшыларға екі жыл бойына ипотекалық займдарды өтеп беру мүмкіндігі берілді.
«Отбасы банк» өкілдерімен бірнеше рет кездесуден соң биыл осы банкпен арада ынтымақтастық туралы меморандумға қол жеткізу жоспарланып отыр. Одан бөлек жұмысшылардың өтінімдерін назарға ала отырып бөлме саны мен мекенжайына қарамастан жалдау ақысы көлемін жылына 1 АЕК-ге дейін қарастыру да көзделуде.