Украинадағы ахуалға байланысты жүкті балама бағытпен тасымалдау ұсынылды
Ресей мен Украина арасында болып жатқан текетірес соғыс Қазақстанға да кері әсерін тигізуде. Әсіресе, жүк тасымалында логистикалық қиындықтардың туындап отырған жайы бар. Осыған байланысты қазақстандық экспорттаушыларға жүктерін еліміздің теңіз порттары арқылы және одан әрі Транскаспий халықаралық көлік бағытымен жөнелту мүмкіндігін пайдалану ұсынылуда.
Жүргізілген келіссөздердің қорытындысында «Арселор Миттал Теміртау» АҚ 50 мың тоннаға жуық металл өнімін Ақтау портына қайта бағдарлап, әрі қарай Әзербайжан мен Грузия арқылы жөнелтуге дайын екенін білдірді. Қазақстан теңіз порттарының жалпы өткізу қабілеті жылына 23,7 млн тоннаны құрайды екен. Атап айтқанда, Ақтау порты – 14,7 млн тонна (мұнай – 9,5 млн, құрғақ жүктер – 2,5 млн, астық – 0,7 млн, паромдық жүктер – 2 млн тонна); Құрық порты – 6 млн тонна (теміржол терминалы – 4 млн, автотерминал – 2 млн); Ақтау солтүстік теңіз терминалы – 3 млн тонна (құрғақ жүктер мен астық 1,5 млн тоннадан) жүк өткізе алады.
Сонымен қатар, қазіргі уақытта еліміздің теңіз порттарына 18 млн тоннаға дейін жүкті қайта бағдарлауға және бір уақытта жүктердің белгілі бір көлемін сақтауға болады. Оның ішінде, Ақтау порты – 2,5 мың контейнер, 25 мың тонна астық, 220 мың бас жүк; Құрық порты – 250 жүк көлігін; Ақтау солтүстік теңіз терминалы – 6 мың контейнер, 60 мың тонна астық, 170 мың тонна басты жүкті сақтау мүмкіндігі бар.
Жүк экспорттаушыларға қосымша ақпарат алу үшін «жедел желі» телефондары ашылған. Ақтау порты бойынша коммерциялық жұмыс бөлімінің +7 (7292) 44 51 27; маркетинг және сату бөлімінің: +7 (7292) 44 51 51 телефондарына, ал Құрық порты бойынша маркетинг және сату бөлімінің +7 705 169 04 44, +7 776 025 77 77 телефондарына хабарласуға болады. Ал Ақтау солтүстік теңіз терминалы бойынша экспедициялау қызметінің +7 (7292) 20 38 78 (1024); көлік-экспедиторлық қызметінің +7 (7292) 20 38 78 (1028) және маркетинг бөлімінің +7 (7292) 20 38 78 (1042) телефондары егжей-тегжейлі ақпарат беруге дайын.