Қазақстан мен Әзірбайжан жүк тасымалын ұлғайта түспек
«Қазақстан темір жолы» ҰК» АҚ Басқарма төрағасы Нұрлан Сауранбаев «Әзірбайжан темір жолдары» ЖАҚ басшысы Джавид Гурбановпен кездесті, деп хабарлайды Rail-news.kz.
Екіжақты келіссөздер барысында Транскаспий халықаралық көлік бағдары бойынша мультимодальдық тасымалдарды одан әрі дамыту мәселелері талқыланды.
Тараптар өткізу қабілетін арттыру және маршруттағы транзиттік уақытты қысқарту бойынша жұмысты күшейту қажеттігін атап өтті. Кездесу қорытындысы бойынша теміржол әкімшіліктерінің басшылары Логистика және бірлескен жобаларды іске асыру саласындағы ынтымақтастық туралы келісімге қол қойды.
Атап айтар болсақ, 2021 жылы ТХКБ маршруты бойынша тасымалдау көлемі 586,2 мың тоннаны, ал контейнер тасымалы 25 270 ЖФЭ-ні құрады. 2022 жылғы қаңтар-наурызда аталған бағдар бойынша 266,3 мың тонна жүк тасымалданып, бұл көрсеткіш 2021 жылдың есепті мерзімімен салыстырғанда 123% артық болып отыр. Ал контейнерлік тасымал 5847 ЖФЭ құрады. Бұл бағытта да өсім бар екені байқалады, яғни өткен жылдың қаңтар-наурыз айларымен салыстырғанда 19% көп.
Еске сала кетсек, биыл екі ел Үкімет басшыларының телефон арқылы әңгімелесулерінде, ҚР Премьер-министрі Әлихан Смайлов: «Әзірбайжан – Қазақстанның сенімді стратегиялық серіктесі. Екіжақты қатынастардың кең ауқымында біздің елдеріміз арасында сындарлы саяси диалог пен жемісті өзара іс-қимыл жолға қойылды. Біз өзара тиімді сауда-экономикалық байланыстарды кеңейтуге және тереңдетуге күш саламыз», – деп атап өткен болатын. Өткен жылы Қазақстан мен Әзірбайжан арасындағы тауар айналымы 332 млн АҚШ долларын құрап, алдыңғы жылмен салыстырғанда үш есеге өскен болатын.
Ал бес жыл бұрын Қазақстан Әзірбайжанға жүк жөнелту үшін Құрық портын ашты. Яғни бұған дейін транзиттік тасымал қолайсыз ауа-райымен ерекшеленетін және бұл жағдай жүкті қайта тиеу табыстылығына кері әсер ететін Ақтау порты арқылы іске асырылып келген еді. Ал Құрық портының ашылуы Әзірбайжан үшін тиімді болды.