Соғыс және тыл ардагерлері пойызда екі ай тегін жүреді
Корреспондент газеты «Қазақстан теміржолшысы»
Ұлы Отан соғысының ардагерлері мен тыл еңбеккерлері ҚТЖ пойыздарында екі ай тегін жүре алады, деп хабарлайды Rail-news.kz.
Мұндай акцияны «Жеңіс» бастамасы аясында «Samruk-Kazyna Trust» әлеуметтік жобаларды дамыту қоры жылда өткізуде.
Акция Қазақстан мен ТМД елдері шегіндегі пойыздардың ҚТЖ қызмет көрсететін бағыттарын қамтиды. Бұл мүмкіндікті 1935 жылдың 31 желтоқсанына дейін туған ҰОС қатысушылары, мүгедектері, тыл еңбеккерлері және еңбек майданының қатысушылары пайдалана алады. Барлық қатынастардағы (ТМД шегінде) барлық санаттағы пойыздардың купелік вагондарында, сондай-ақ қала маңындағы қатынастағы пойыздарда, "Турист" класты вагондарда және "Talgo" компаниясының вагондарынан қалыптастырылған пойыздарда мүмкіндігі шектеулі адамдарға арналған мамандандырылған купеде тегін жол жүру көзделген.
Тегін жол жүру құжаттарын ресімдеу үшін "Жолаушылар тасымалы" АҚ билет кассасына Қазақстан Республикасы азаматының жеке басын куәландыратын құжатты, сондай-ақ Ұлы Отан соғысына қатысушының немесе мүгедегінің куәлігін, тыл еңбеккері және еңбек майданының қатысушысы ретінде арнайы мемлекеттік жәрдемақы тағайындау туралы уәкілетті органның белгісі бар зейнетақы куәлігін ұсыну қажет. ТМД елдеріне барған жағдайда тегін жол жүру құжаттары Қазақстан Республикасының аумағында орналасқан сату пункттерінде ғана ресімделеді.
Науқан 2022 жылдың 30 маусымына дейін жарамды.