«Самұрық- Қазына» АҚ өкілдері қызылордалық теміржошлылармен жүздесті
Қызылорда облысы бойынша меншікті тілшісі
«ҚТЖ-ЖТ» ЖШС «Батыс» филиалына қарасты Қызылорда қосалқы бөлімінде аймақ теміржолы басшыларының «Самұрық- Қазына» АҚ Қоғаммен байланыс және өзгерістерді басқару жөніндегі басқарушы директоры Ғибрат Ауғанов бастаған қор өкілдерімен кездесуі болып өтті, деп хабарлайды Rail-news.kz.
Соңғы кезде ауқымды құрылымдық өзгерістерді бастан кешіп отырған қор орын алып отырған жағдайға байланысты түсінік беріп, биылға және алдағы жылдарға арналған жоспарымен бөлісуді жөн көріпті. Стратегиялық компания ретінде жұмыс жасап келген қор алдағы уақытта инвестициялық холдинг дәрежесінде жұмыс жасауға бағыт алған.
Қор есебіне кіретін компаниялардағы 250 мыңға жуық адамның жартысын ҚТЖ еңбеккерлері құрайтындықтан (146 мың) «Самұрық-Қазына» қорының өкілдері алдымен теміржолшылармен кездесіп, олардың ұсыныс-тілектерін де тыңдады. Теміржол саласына байланысты туындап отырған сауалдар міндетті түрде ескеріліп, алдағы жұмыс жоспарынан тыс қалмайтыны айтылды.
Өңірдегі салалық, өндірістік жұмыстарды жетілдіруге қатысты сауалдар аз болған жоқ. Сексеуіл-Қоскөл телімінде вахталық тәсілмен жұмыс жасайтын теміржолшылардың 2014 жылы берілген вагон-модульдерде тұрып жатқандығы, қазіргі таңда оны жаңарту жоспарда болса да, орындалуы кешіктірілуде екенін, сонымен қатар жолшылар қолданысындағы көліктерді ауыстыру мәселесін Магистральдық желі бөлімшесінің бастығы Ибраким Басықараев көтерді. «Қазкөліккәсіп» ҚБ филиалының төрағасы Бауыржан Ахметов теміржолшылардың еңбекақысын көтеруді, экологиялық төлем төленгеннің өзінде аймақ теміржолшыларының өзге аймақтағы әріптестері деңгейінде жалақы алатынын жеткізіп, оптимизацияға қатысты теміржолшылардың зейнет жасын төмендетуді ұсынды. Сонымен қатар, аймақ теміржолының технологиялық талаптарға сай болуы үшін сатып алынатын керек-жарақтарға тендердің ертерек өткізілуі де сөз болды.
Жалпы жиында «Самұрық-Қазына» АҚ өкілі алдағы уақытта 15 мың адамды жұмыспен қамтитын жобалар қолға алынатынын, қор жаңа реформамен жедел және жүйелі жұмыс жасау тетігіне көшкенін, ал осынау жоспарлы шаралардың негізі адам факторына аса мән беруге бағытталып отырғанын жеткізді.