Атырау вокзалына лифт орнатылады

Атырау темір жол вокзалына екі лифт орнатылмақ. Бұл туралы Атырау магистральдық желі бөлімшесіне қарасты вокзал шаруашылығы бөлімінің бастығы Айбек Қуанышев мәлімдеді.

Бұған дейін мүгедектер үшін вокзалда лифтінің жоқтығы қиындық тудыратыны жергілікті тұрғын- дар тарапынан талай айтылып, үнемі сынға алынып келген болатын. Вокзалдың екінші қабатына және туннель арқылы 2, 3-ші жолдарға өту тіптен қиын. Мүгедектік арбасына таңылғандар үшін бұл нағыз азап еді. 

Сондықтан бұл мәселе күн тәртібінен түспесе де қаржы қарастырылмаған, жоспарға енбеген деген сынды түрлі сылтаумен осы кезге дейін шешімін таппай келді. 

Міне енді осы олқылықтың орны толтырылып, бөлімше бұл мәселені шешуге құлық танытып отыр. Лифтінің бірі вокзалдың бас ғимаратына екінші қабат арқылы 1-ші жолға шығу үшін, ал екіншісі туннель арқылы өтетін жердегі қосалқы жолдарға шығу үшін орнатылмақшы. Мүгедек жандармен қатар қарт кісілерге де бұл үлкен жеңілдік әкелетіні сөзсіз. 

Атырау темір жол вокзалы 1972 жылы бой көтеріп, 500 орынға лайықтап салынған болатын. Одан бергі 50 жылда ішкі-сыртқы миграцияның ұлғаюына байланысты жолаушылар саны да артып, бүгінде тәулігіне 3-3,5 мыңға дейін барады. «Елу жылда ел жаңа» демекші, кезінде болмаған жаңа технологиялар бүгінде сұранысқа ие болып, вокзал қайта жабдықталып, жаңартылуда.