400-ден астам кірме жол ҚТЖ иелігіне беріледі
«Қазақстан теміржолшысы» газетінің тілшісі
ҚР Үкіметінің қаулысына сәйкес «Көлік сервисі орталығы» АҚ акцияларының жүз пайыздық пакеті республикалық мемлекеттік меншікке қабылданды. Қазіргі уақытта акцияларды кейінірек «Қазақстан темір жолы» ҰК» АҚ-ға беру ұйғарымымен «Самұрық-Қазына» АҚ меншігіне өткізу процесі жүріп жатыр.
Еске сала кетсек, Қазақстан Президентінің тапсырмасы бойынша және Үкіметтің 2022 жылғы 20 сәуірдегі №233 қаулысы негізінде, теңгерімінде Қазақстан бойынша 400-ден астам кірме жолы бар Көлік сервисі орталығының акцияларын мемлекеттік меншікке беру туралы шешім қабылданған болатын. Осыған орай, «Қазақстан темір жолы» ҰК» АҚ-да Көлік сервисі орталығының кірме жолдарында вагондарды қою және алу үшін, сондай-ақ қозғалыс қауіпсіздігін және жылжымалы құрамның сақталуын қамтамасыз ету үшін жұмыс топтары құрылды. Оларды «ҚТЖ-Жүк тасымалы» ЖШС филиалдары – жол бөлімшелерінің директорлары басқарды. Аталған топтарға «ҚТЖ» ҰК» АҚ филиалдарының – магистральдық желі бөлімшелерінің, заң және қаржы-экономикалық қызметтердің өкілдері кірді.
Бұдан басқа, «ҚТЖ» ҰК» АҚ «Келісімшарттық және коммерциялық жұмыс» автоматтандырылған басқару жүйесіне жылжымалы құрамның жүруі, маневрлік жұмыстар, вагондарды тиеп-түсіру және басқа да технологиялық операциялар үшін, сондай-ақ жылжымалы құрамның тұруы үшін кірме жолды ұсынуға қатысты КСО қызметтері бойынша әр түрлі алымдар мен өзге де түсімдердің жаңа баптары енгізілді.
Уәкілетті орган КСО-ның 2022-2026 жылдарға арналған тарифтерін бекітті, олар өңірге байланысты 80-92%-ға төмендетілді. Атап айтқанда, маневрлік жұмыстар, тиеу-түсіру және басқа да технологиялық операциялар, сондай-ақ жылжымалы құрамның тұрағы үшін кірме жолды ұсыну тарифі осы жылға 8,7 теңге вагон/сағат (ҚҚС-сыз) мөлшерінде бекітілді. Ал жылжымалы құрамның жүруі үшін кірме жолды ұсыну тарифі 147,3 теңге вагон-км (ҚҚС-сыз) мөлшерін құрап отыр.