«Жас темір» жобасы жеңімпаздары тәлімгерлерімен танысты

Кеше «Қазақстан темір жолы» ұлттық компаниясында «Жас темір» жобасы жеңімпаздарының тәлімгерлерімен танысу рәсімі өтті.

«Жас темір» – «ҚТЖ» ҰК» АҚ-да еңбек жолын бастағысы келетін дарынды жастарды іріктеу, тарту және дамыту бағдарламасы. «Самұрық-Қазына» ұлттық әл-ауқат қоры мен «Жас Өркен» жас мамандарды дамыту бағдарламасын тираждау мақсатында құрылған. Оның шеңберінде «ҚТЖ» ҰК» АҚ құрылымдық бөлімшелерінде басшылар тәлімгерлігімен қатысушыларды конкурстық іріктеу және тағылымдама бағдарламасы көзделген еді. Конкурсқа 2020-2021 жылдары теміржол мамандығы бойынша жоғары оқу орнын бітірген жастар қатысып, төрт кезеңнен: мотивациялық эссе жазу, біліктілік тестілеуінен өту, құзыреттілігіне қатысты сұхбат барысында сұрақтарға жауап беру және конкурстық комиссиядан өтуі тиіс болды. Адами ресурстарды басқару департаментінің бас менеджері Жанар Бейжанова, 40-қа жуық адам қатысқан «Жас темір» бағдарламасының бес жеңімпазы іріктеліп отырғанын, енді олар жеке тәлімгерге бекітіліп, негізгі мамандығы бойынша 3 ротациядан өтетінін атап өтті. Сонымен қатар тағылымдамадан өту барысында жоба жеңімпаздары Компания есебінен жатақханада тегін тұрып, оларға ай сайын жалақы жүреді екен, екі рет сый- ақы алмақ. Ең бастысы, дамудың жеке жоспарын және мақсаттарын жоспарлау, сондай-ақ, кәсіби мамандармен жұмыс істеу мүмкіндігіне ие болмақ.  

– Бағдарлама аясында қатысушылар «Қазақстан темір жолы» ұлттық компаниясының құрылымдық бөлімшелерінде ротациялардан өтеді. Әрбір ротация 5 айға созылады. Әрине, бұл тәлімгерлер 1,5 жылдан кейін міндетті түрде Ұлттық компанияға жұмысқа қабылданатын болады. Бәлкім, біреулері өндірістік жұмыстарға тез бейімделіп, меңгеріп кетіп жатса, ертерек орнығуы да мүмкін, – деген Адами ресурстарды басқару департаментінің директоры Сәуле Истлеева тәжірибеден өтушілерге сәттілік тіледі.