Көлік қызметкерлері күнімен
Жылдағы дәстүр бойынша тамыздың алғашқы аптасы кәсіби мерекелерін атап өтетін теміржолшылар үшін тағы бір мерейлі күн туды.
Көлік қызметкерлері күні – жыл он екі ай ыстыққа күйіп, суыққа тоңып жүріп еңбек ететін осы бір жанкешті кәсіп иелерінің ерен еңбегі еленетін күн, құшақтар гүлге толып, ақ тілек ағылатын күн, құрмет пен қошемет кеудеге марапат боп тағылатын күн. Биыл Көлік қызметкерлері күніне орай 1684 адам түрлі марапаттарға ие болмақ. Соның ішінде саланың ең жоғарғы кәсіби марапаты – «Құрметті теміржолшы» белгісімен 81 адам марапатталады.
Одан басқа «Кәсібі бойынша үздік», «Үздік басшы», «Адал еңбегі үшін» төсбелгісін алатын қызметкерлер қатары да қалың. 48 теміржолшы «Үздік мамандар» құрмет тақтасынан орын алса, тағы бір топ сала қызметкері «ҚТЖ» ҰК» АҚ басқарма төрағасының құрмет грамотасы мен алғыс хатына ие болады. Кәсіби мереке құтты болсын, құрметті сала қызметкерлері!