Кадр саясаты - күрделі жұмыс
«Қазақстан теміржолшысы» газетінің тілшісі
«Жолаушылар тасымалы» АҚ Адами ресурстарды басқару департаментінің директоры Майра Ермаханбетованың персоналмен жұмыс тәжірибесі өте үлкен. ҚТЖ-ға 2008 жылы ҚР Президент әкімшілігінен арнайы шақыртумен келген маман – бүгінде еншілес компанияда кадр жұмысын жолға қойған білікті басшылардың бірі.
Көп жыл мемлекеттік қызметте жұмыс істеген Майра Ермаханбетованың бірнеше жоғары білімі бар. Гуманитарлық, техникалық мамандығы бар және ҚР Президенті жанындағы Мемлекеттік қызмет академиясын бітірген. Бүгінде «Жолаушылар тасымалы» АҚ-ға қарасты 5 филиал мен «Вагонсервис» АҚ және «Қала маңы тасымалы» АҚ сияқты мекемелердің кадр ісі бойынша тікелей және жанама түрде жүргізілетін жұмыстарын басқаратын Майра Сейфуллақызы бір кездері теміржолда жұмыс істеймін деп еш ойламапты. Бірақ арнайы шақырумен келген соң сенімнен шығу үшін осы саланы жан-жақты меңгеріп, кадр саясатын түсінуге көп уақыт жұмсады.
– Кадр саясаты – күрделі жұмыс. Қызметкерлерді жұмысқа қабылдау, оларды іште басқа жұмыстарға ауыстыру, кезекті еңбек демалысын есептеу, бала күтіміне байланысты демалыстарды рәсімдеу, оқуға аттанғандар құжатын жасақтау, жеке даму жоспарының орындалуын, сыйақы мен жалақыны есептеушілердің жұмысын қадағалау, жыл сайын өзгеретін еңбекақы төлеу жүйесіне көшу, тағысын тағы жұмыстар жүктелген біздің департаменттің жұмысы оңай емес. Одан бөлек пойыз бригадасының бастығы болып көтерілетін жолсеріктердің нұсқаулықтарды дұрыс өтуін қадағалап, қызметкерлердің жыл сайын стандарттарға сәйкес кәсіби деңгейін көтеруге бағытталған жұмыстарды жүргіземіз, – дейді кейіпкеріміз.
Теміржолдағы кадрмен жұмыс істеуде бұрынғы мемлекеттік қызметтегі мол тәжірибесі көмегін тигізгенін айтады. Жолсеріктерді конкурспен жұмысқа қабылдау, арнайы курстан өтуді міндеттеу сынды талаптарды енгізуде Майра Ермаханбетова басқаратын департамент аз еңбек сіңірген жоқ.
– Бұрын жолсеріктерді тамыр-таныстықпен арнайы білімі болмаса да жұмысқа ала беретін болған, қазір міндетті түрде теміржол саласында кем дегенде орта арнаулы кәсіптік білімі және 3-6 айлық немесе 1 жылдық жолсерік курсын оқығаны туралы сертификат талап етіледі. Сонымен қатар арнайы конкурстан өткендер ғана жұмысқа қабылданады. Жолсеріктердің жалақысы соңғы жылдары бірнеше рет көбейді. Оқыту шаралары кезінде олардың күйзеліске төзімділігі, қызмет этикасы тексеріледі, – дейді ол.
Салаға сіңірген еңбегі үшін «ҚТЖ» ҰК» АҚ басшылығы тарапынан бірнеше рет Құрмет грамоталары мен Алғыс хаттарға ие болған, 2014 жылы «Ерен еңбегі үшін» медалімен марапатталған кейіпкеріміз бос уақытын әйел-ана ретінде отбасына арнап, немерелеріне әже болуды да ұмытпайтынын айтады.