Ел экономикасының локомотиві
Ақтөбе облысы бойынша меншікті тілші
Ақтөбелік теміржолшылардың ерен еңбегі нәтижесінде биылғы жеті айда аймақтағы жүк тасымалының көлемі 105 пайызға жетті. Ел экономикасында елеулі орын алатын сала қызметкерлерінің жетістігі кәсіби мерекеге орай өткен жиында паш етілді.
«ҚТЖ-Жүк тасымалы» ЖШС Батыс аймақтық филиалының басшысы Бөріхан Беркімбаев көпшілікті компанияның 25 жылдығымен құттықтап, ширек ғасыр ішінде ел экономикасын дамытуға орын берген жұмыстарды атады.
– Төл мерекемізге жақсы көрсеткішпен келдік. Қазір жүк айналымы жеті айда 105 пайызға орындалды. Жүк тиеу көрсеткіші 82 пайызды құрап отыр. Мұның бәрі – үлкен жұмыс, сіздердің еңбектеріңіз. Құрметті әріптестер, баршаңызды мерекелеріңізбен шын жүректен құттықтап, еңбекте абырой, отбасыларыңызға амандық тілеймін, – дейді Бөріхан Сматуллаұлы.
Жылы лебізге толы құттықтаулардан кейін үздік шыққан теміржолшылар марапатталды. Атап айтсақ, Ұлттық компания басшысы Нұрлан Сауранбаевтың бұйрығымен мінсіз, адал қызметі, теміржол саласының дамуына қосқан айтарлықтай үлесі үшін «Пойыздар қозғалысын басқару орталығының тартымдық жылжымалы құрам жөніндегі бөлім бастығы Космонавт Шөмекеев, Ақтөбе магистральдық желі бөлімшесі филиалы директорының экономика және қаржы жөніндегі орынбасары Хадиша Жұмабекова, «Батыс» филиалының техникалық бөлім бастығы Айболат Дарбаев, Шалқар электрмен жабдықтау дистанциясының бас инженері Бақытбек Ешманов, Дөң станциясының бастығы Нұржан Ақшаев «Адал еңбегі үшін» төсбелгілерімен марапатталды. Өндірістік-шаруашылық қызметте жоғары нәтиже көрсетіп, қозғалыс қауіпсіздігін қамтамасыз еткені үшін Ақтөбе электрмен жабдықтау дистанциясы мен Ақтөбе белгі беру және байланыс дистанциясы ұжымдары «Салалық жарыстың жеңімпазы» байқауының жүлделі дипломдарымен марапатталды.