Павлодарлық теміржолшы өртеніп жатқан көліктен адамдарды құтқарып қалды

Красноармейка станциясында темір жол монтёры болып жұмыс істейтін Еркебұлан Жүзбаев өз өмірін қатерге тіге отырып, өртеніп жатқан автокөліктен төрт адамды құтқарып қалды, деп хабарлайды Rail-news.kz.

Павлодар-Шарбақты автожолының Маралды станциясы маңында Audi 100 маркалы көлігі КамАЗдың тіркегішіне соғылып, кейіннен өртене бастаған.  

42 жастағы теміржолшы көп ойланбастан көліктің салонында ес-түзсіз жатқан адамдарды құтқаруға ұмтылған. Бұл кезде салонның ішін қою түтін басқан. Оқиғаның куәгерлері лаулаған отқа қарап тұрғанда Еркебұлан бірден жолаушыларды шетінен шығара бастады. Жиналған топтың ішінен тек бір адам ғана соңғы екі адамды шығаруға көмектескен. Олар зардап шеккен адамдарды қауіпсіз жерге шығарысымен, өртеніп жатқан көлік бұрқ етіп атылған.

– Мен ауысымнан шығып келе жатқам, өртеніп жатқан көлікті көргенде көмек берейін деп тоқтадым. Көлік әне-міне дегенше жарылатыны белгілі еді, бірақ жолаушылар көлік салонынан шығуға асықпады. Олардың ес-түзсіз күйде екенін немесе есігін аша алмай жатқанын бірден түсіндім, – деп еске алады Еркебұлан.  

Зардап шеккендерді жедел жәрдем алып кеткен соң, Еркебұлан Жүзбаев ол жерден кетіп қалған. Сол сәтте дереу үйге оралғысы келгенін айтады. Ол көлік апатынан зардап шеккендер тезірек сауығып кетсе деген ниетте.

Павлодар облыстық денсаулық сақтау басқармасының дәрігерлері жолаушылардың өмірі үшін күресіп жатыр. Құтқарылғандардың бірі комада, қалғандары ауыр жағдайда. Олардың барлығы тойға баруға асыққан екен.

Қазір павлодарлықтар Еркебұлан Жүзбаевты марапатқа ұсынғалы отыр, алайда оның бірінші болып көмекке ұмтылғанын дәлелдеу үшін әлеуметтік желіде куәгерлерді іздестіріп жатыр. Зардап шеккендердің туыстары олармен байланысқа шығып үлгерген.