Қазтеміртранс қызметкерлері ҚТЖ-ның 25 жылдығына тимбилдинг ұйымдастырды
Корреспондент газеты «Қазақстан теміржолшысы»
Өткен демалыс күні елорданың орталық саябағында «Қазтеміртранс» АҚ-ның жұмысшылары мен отбасылары спорттық тимбилдингке қатысты. Аталған шара «ҚТЖ» ҰК» АҚ-ның 25 жылдығына арналды, деп хабарлайды Rail-news.kz.
Теміржолшылар күрделі әрі қызықты тапсырмалар бойынша бақ сынасып, жаңа белестерді бағындыруды үйренді.
Челлендж бағдарламасында ұжымдық іс-шараны көңілді әрі ашық-жарқын форматта өткізу көзделген. Бірінші турда барлығына «Сақина лақтыру» ойыны ұнап қалды. Ол жерде сақинаны нысанаға дәл түсіріп, өз командаңа неғұрлым көп ұпай жинай білуің керек. Сондай-ақ алып зымыранмен жүгіру эстафетасы да көпшілікке жақсы көңіл-күй сыйлады.
Челлендждің екінші кезеңі зияткерлік тапсырмаларға толы болды. Теміржолшылар өздерінің тапқырлығын көрсете отырып, бұл кезеңді де үлкен ыждаһаттықпен еңсеріп шықты.
– Барлығымыз ұжыммен және отбасы мүшелерімізбен бірге бұл күнді позитивті, әдемі өткізгенімізге қуаныштымыз. Мұндай шаралар бізді жақындастырып, ұжымдық рухты нығайта түседі және адамның өзге қырын аша түседі. Бұл кейін еңбекке де жақсы әсер етіп, күнделікті жұмыста оң нәтижесін береді. Кім жақсы жұмыс істесе, сол керемет демалады, деп бекер айтпайды ғой, – дейді «Қазтеміртранс» АҚ-ның қызметкерлері.