Темір тұлпарлар қысқа дайын
![](https://rail-news.kz/uploads/2022/09/27/Ssr4owxJgAGKLxiMawnCwyP5zPUhXmCapM5wOjAg.jpg)
![](https://rail-news.kz/img/noimg.png)
Маңғыстау облысы бойынша меншікті тілші
Қыстың қамын жаз жасау – теміржолшылар үшін қалыптасқан тірлік. Маңғыстау локомотив пайдалану депосында қазір алдағы қатал маусымға дайындық жұмыстары қызу жүріп жатыр.
Биыл мұндағы күзгі комиссиялық байқау, яғни тепловоздарды қысқы маусымға әзірлеу жұмыстары 10 қыркүйектен басталған болатын. Депоның локомотив паркінде жалпы 58 тепловоз бар. Оның ішінде 37-сі 2ТЭ10МК сериялы жүк пойызын тасымалдайтын тепловоздар. 15-і ТЭМ сериялы маневрлік, 7 локомотив – ТЭ33А сериялы жолаушылар пойызын тасымалдауға арналған тепловоздар. Күзгі комиссиялық байқаудан 42 локомотив өтуде. Қалғаны күрделі жөндеуден өтуіне байланысты күзгі комиссиялық байқауға жатқызылмайды.
– Бүгінгі күнге дейін күзгі комиссиялық байқаудан 5 тепловоз өтті, екеуі 2ТЭ10МК сериялы, үшеуі ТЭМ сериялы тепловоздар. МК және ТЭ33А тепловоздарына Мақат, Шалқар, Сексеуіл деполарында жөндеу жүргізіліп жатыр. ТЭМ2 тепловоздары өзіміздегі «Ғасыр Маңғыстау» жөндеу орнында қажет дайындығын алуда. Дайындық жұмыстары өз деңгейінде, қысқасы, қысқа қызу дайындық жүріп жатыр, – дейді Маңғыстау локомотив пайдалану депосының жөндеуді бақылау бөлімі бастығы Сәбит Зияев.