Қандыағаш станциясы қыс маусымына дайын
Ақтөбе облысы бойынша меншікті тілші
Қандыағаш – тоғыз жолдың торабындағы ірі станция. Батыстың жүрегі атанған станция Никельтау, Ақтөбе, Жем, Мақат бағыттарына қызмет көрсетеді, деп хабарлайды Rail-news.kz.
Тәулігіне 70 жүк пойызы қабылданып, тағы соншасы жөнелтілетін станциядан 10-15 жолаушылар пойызы өтеді. Ал мұндағы сұрыптау дөңесінде тәулігіне 2400-2500 вагон сұрыпталады. Қазіргі таңда станцияда 7 бірдей маневрлік локомотив жұмыс істейді. Станция бүгінгі таңда қыс маусымына дайындық жұмыстарын аяқтады. Күзгі байқау кезінде станция ұжымы аумақты тап-тұйнақтай етіп, 15 посттың барлығы сыланып, ақталып, тазаланды.
«Барлық посттар электрлі-жылу жабдығына көшіріліп, кабельдер қайта тексеруден өтті. Қажетті қондырғылар уақытында алмастырылды. Станция жылыту маусымына толықтай дайын», – дейді Қандыағаш станциясының жетекші инженері Мұқан Бұхарбаев.
Қазіргі уақытта станция басында екі үлкен қар тазалау машинасы (ФРЭС-2), алты қар күреу машинасы (СМ-2) және СДПМ техникалары қыс маусымына дайын тұр. 250-ден аса теміржолшы еңбек ететін станцияның өткен ғасырдан басталатын 120 жылдық тарихы бар.