«Жас темір» жеңімпаздары тәжірибелі теміржолшылармен кездесті
«Қазақстан теміржолшысы» газетінің тілшісі
«ҚТЖ» ҰК» АҚ-ның өзінде және желілерінде тағылымдамадан өтіп жатқан «Жас темір» бағдарламасының бес жеңімпазы Компания топ-менеджерлерімен кездесіп, тәжірибелі теміржолшылармен әңгімелесті.
Сәрсенбі күні өткен шарада «ҚТЖ» ҰК» АҚ Аппарат басшысы Серік Кеулімжаев бағдарлама жеңімпаздарын құттықтай отырып: «Сіздер тағылымдамадан өтумен қатар шәкіртақы аласыздар. Теміржолшы ретінде дұрыс бағытты таңдапсыңдар. «Жас темір» бағдарламасы Компанияда 2022 жылдың қаңтар айында енгізілді. «Самұрық-Қазына» әл-ауқат қорында осыған ұқсас «Жас өркен» және «Цифрлы жаз» бағдарламалары бар. Компаниядағы жаңа бағдарламаның алғашқы қарлығаштары ретінде сіздер келешекте өз тәжірибелеріңізбен бөлісетін боласыздар», – деді.
Кездесу барысында компанияның Қозғалыс қауіпсіздігі бас ревизоры Марат Шакенов те сөз алып, жастардың еңбек жолын қарапайым жұмысшыдан бастап жатқанына қолдау білдірді.
«Менің теміржолда еңбек етіп жатқаныма қырық жыл болды. Мен де сіздер сияқты еңбек жолымды ең төменгі сатыдан бастадым. Сол адал еңбектің, көп жылғы тәжірибенің арқасында басшылық лауазымдарға көтерілдім. 2019 жылдан бастап «Жас өркен» бағдарламасына қатысып, жастарды еңбекке баулып, теміржолшы болып қалыптасуларына атсалысып келемін. Сіздерге де ашық екенімді, білмеген нәрселеріңді қысылмай сұрап, сұрақтарыңды қоя беруге болатынын айтқым келеді», – деді Марат Шакенов.
Жиында тағылымдамадан өтіп жатқан «Жас темір» бағдарламасының жеңімпаздары да сөз алып, алғашқы әсерлерімен бөлісті.