Интеллектуалдық меншік нысандарын құқықтық қорғау бойынша семинар өтті
«Қазақстан теміржолшысы» газетінің тілшісі
ҚТЖ-ның ғылыми-техникалық кітапханасында «Интеллектуалдық меншік нысандарының құқығын қорғау» тақырыбында семинар өтті.
Техникалық орталық ұйымдастырған іс-шараға компанияның құрылымдық бөлімшелері мен еншілес ұйымдарынан 50 қызметкер қатысты. Семинардың мақсаты – компанияның жауапты қызметкерлерінің интеллектуалдық әлеуетін арттыру үшін интеллектуалдық меншік құқығын қорғау және сақтау бойынша ҚР-ның қолданыстағы стандарттары бойынша маңызды ақпараттар ұсыну. Жиында 8 тақырып көтерілді. Атап айтқанда, «ҚТЖ» ҰК» АҚ-ның интеллектуалдық қызметі, интеллектуалды меншік нысандарын құқықтық қорғау маңыздылығы мен артықшылығы, авторлық құқық нысандарын құқықтық қорғау, жеке шығармашылыққа авторлық құқық тіркеу, отандық және халықаралық деректер базасы бойынша патенттік іздеу, ІТ шешімдерді патенттеу, Еуразиялық патенттік конвенция аясында өнімді өңірлік патенттеу, интеллектуалдық меншік нысандарын құқықтық қорғау алғышарттары тақырыптары талқыланды. Семинарға қатысушылар өкілетті органға интеллектуалдық меншік нысандарын тіркеу және беруге қатысты мәселелерді сөз етті, сонымен қатар интеллектуалды меншік бойынша актілерге енгізілген өзгерістер және толықтырулармен танысты.