Әкімдік өкілдері теміржол мекемелерінің жұмысымен танысты

Түркістан облысы әкімінің орынбасары Ермек Кенжеханұлы Арыс қаласына жұмыс сапары барысында бірнеше теміржол мекемелерінде болды. Соның бірі – теміржол машиналарына сервистік қызмет көрсететін «S.G.M-group» ЖШС жұмысымен жанжақты танысты.

Өңірлік және жергілікті атқарушы билік өкілдерін «S.G.M-group» ЖШС-нің бас директоры Бауыржан Ескермесов күтіп алып, кәсіпорынды аралатты. Кәсіпорын басшысы еңбек өнімділігі мен жұмысшылар жағдайы, өндірістік қауіпсіздікті сақтай отырып, табысты еселеу арқылы өңір экономикасына қосылып жатқан үлес туралы әңгімеледі.  

Айта кетейік, сексен жылдан астам тарихы бар байырғы теміржол мекемесі, бүгінде «S.G.M-group» ЖШС аталатын кәсіпорын ВЛ80С, ВЛ60, ВЛ40М сериялы ескі және жаңа заманауи үлгідегі KZ8А сериялы электровоздар мен ТЭМ-2 тепловоздарына техникалық сервистік қызмет көрсетумен айналысады. Сондай-ақ, бұл кәсіпорын жолаушылар вагондарын деполық және күрделі жөндеуден өткізуге де қауқарлы.