Астананың ескі вокзалы күрделі жөндеуден өтеді
«Қазақстан теміржолшысы» газетінің тілшісі
Елорданың қалалық мәслихат депутаттары Астана станциясындағы ескі вокзалға барып, ғимараттың қазіргі жай-күйімен танысты.
Халық қалаулылары жолаушыларға қолайлы жағдай жасауда кедергі келтіретін мәселелерді анықтап, қорытынды жиында соларды шешуге қатысты ұсыныстар айтылды.
«ҚТЖ» ҰК» АҚ бас инженері Батыр Котырев депутаттарды вокзалдың күту залымен, екінші жолға өту аралықтарымен таныстырды. Халық қалаулылары пойыз күткен жолаушылар шағымына да құлақ түрді. ҚТЖ компаниясының вокзал шаруашылығы департаменті мен вокзал басшылығына көзбен көрген кемшіліктерін жеткізді. Пойыздардың сағаттап кешігуіне байланысты сын айтқан жолаушылар шағымына байланысты телімдерде жөндеу жұмыстары жүргізіліп, соған орай белгілі бір уақыт аралығында қозғалыс шектеледі деген уәж айтылды.
– Бұл – елордадағы ең ескі тарихи ғимарат. Ескі жағы 1961 жылы, ал қасындағы қазір жолаушылар қабылдайтын жаңа бөлігі 1990 жылы салынған. Аумағы 11 174 шаршы метр. Орташа жолаушылар ағымы тәулігіне 10 670 адам. Екі жолаушылар платформасы және жолаушылар пойыздарын жөнелтетін 3 жолы бар. Соңғы рет мұнда күрделі жөндеу 2004 жылы жасалған. Сондықтан жөндеуге қажеттілік жоғары. Мердігер мекеме 2023 жылы вокзалды жөндеу бойынша жобалық-сметалық құжатты дайындайды. Күрделі жөндеу 2024 жылы жүргізіледі, – деді Б.Котырев. Бас инженер Астана қаласы мәслихатының депутаты болып табылады.
Қорытынды жиында сөз болған мәселелер мәслихаттың алдағы отырысында қаралып, шешімін табатын болды. Айта кетсек, қалалық мәслихат депутаттарының ескі вокзалға ат басын бұруының өзіндік себебі жоқ емес. Бас қала тұрғындары арасында қала қақпасы аталатын теміржол вокзалының жай-күйіне көңілі толмайтын жолаушылардың пікірлері әлеуметтік желілерде соңғы кезде жиілеп кеткен болатын. Сондай шағымның бірі вокзал эскалаторларының жұмыс істемей тұрғанына қатысты айтылыпты. Осы мәселе бойынша Астана теміржол вокзалының бастығы Ғалым Әбдіханға хабарласқанымызда, ол қазір эскалаторлардың барлығы да жұмыс істеп, халыққа қызмет етіп жатқанын, іске қосылғанына 7-8 күн болғанын мәлімдеді.