Семейде теміржол мекемелерінен ашық ауаға шығатын залалды заттар төмендеген
Шығыс Қазақстан облысы бойынша меншікті тілші, Семей
Семейлік теміржолшылар қоршаған ортаны қорғау мен экологиялық іс-шаралар жүргізуге қомақты қаржы бөліп отыр.
Теміржол мекемелерінің өткен жыл бойынша ашық ауаға шығарған залалды заттары 48,545 тоннаны құраған. Бұл – бұрынғы жылдармен салыстырғанда анағұрлым төмен көрсеткіш. Ал берілген лимит 57 т екендігін ескерсек, бұл бағытта аз жұмыс атқарылмағанын түсінуге болады.
– Қоршаған ортаға бөлінетін зиянды қалдықтардың азаюына желі бойындағы көптеген станциялардағы жылыту пештерінің электрлі қазандықтарға ауыстырылуы себеп болып отыр. Әсіресе Шемонайха, Риддер станциясындағы ПТО және Шар станциясындағы ТД-17 пештерінің консервацияға алынуын айтуға болады, – дейді Семей бөлімшесінің эколог мамандары.
Осыған дейін Жарма, Шөптіқақ, Жаңғызтөбе, Бұқтырма, Зыряновск, Серебрянка сынды шалғайдағы бірқатар станциялар электрлі жылытқышқа көшірілген-ді. Соның нәтижесінде қазіргі таңда ол станцияларда ауаға жіберілетін парниктік газ көлемі де айтарлықтай мөлшерде азайған.
Сол тәрізді соңғы айларда өндіріс және тұтыну қалдықтары да біршама төмендеген. Мәселен, өткен жылы бөлімше көлемінде табиғатты қорғау бойынша 11 іс-шара жүргізілген болса, биылғы жылы олардың санын 15-ке дейін арттыру жоспарланып отыр. Бөлінген қаражат та қомақты.