Маңғыстау қосалқы бөлімінде кітап көрмесі ұйымдастырылды
Маңғыстау облысы бойынша меншікті тілші
"Бір ел - бір кітап" акциясы аясында «Қазақ әдебиетінің тұлғасы» Төлен Әбдіктің шығармаларын насихаттау мақсатында Маңғыстау ауылдық кітапханасы Маңғыстау қосалқы бөлімінің ғимаратында жылжымалы көрме ұйымдастырды, деп хабарлайды Rail-news.kz.
Айта кету керек, аталған республикалық акция 2007 жылдан бастап Мәдениет және спорт министрлігінің қолдауымен еліміздің Ұлттық Академиялық Кітапханасы мен ҚР кітапханалары қауымдастығының бастамасымен өткізіліп келеді.
– Акцияның мақсаты – ұлттық әдебиетіміздегі ең үздік туындыларды оқу және насихаттау, оқу ісін ілгерілету, рухани мұрамызды сақтау, сондай-ақ жастарға рухани-адамгершілік және патриоттық тәрбие беруге бағытталған. Сонымен қатар, акция қоғамның отандық әдебиетке, оның ішінде классикаға, қазіргі әдебиет пен поэзияға деген қызығушылығын әрі қарай жоғарлатуына мүмкіндік туғызады. Осы мақсатта бүгін теміржолшыларға аталған көрмені өткізіп отырмыз, – дейді ұйымдастырушылар.
Биыл «Бір ел - бір кітап» республикалық акциясы аясында қазақ жазушысы, драматург, қоғам қайраткері Төлен Әбдіктің шығармалары оқуға ұсынылды.
Төлен Әбдік – қазақ прозасында ерекше қолтаңбасы бар қаламгер.
– Ол кісінің шығармалары 1964 жылдан бастап түрлі газет-журнал беттерінде жарияланған. Төлен Әбдіктің алғашқы шығармасы университет қабырғасында көңіліне ұнаған бойжеткенге байланысты жазылған. Замандастарының айтуынша, сол күнде жас та болса сол әңгімесі өз ортасында біраз талқыланып, жақсы бағаланған. Сондықтан теміржолшыларды бұл тұрғыда хабардар етіп, кітап оқуға қызығушылығын ояту мақсатында келіп отырмыз, – дейді ұйымдастырушылар.