ҚТЖ Қытаймен логистикалық байланыстарды кеңейтуде

Осы жылдың 1 наурызында Қытайға ресми сапар аясында «Қазақстан темір жолы» ҰК» АҚ басшылығы қала мэрі Ли Миньюан мырза бастаған Сиань қаласы әкімшілігі өкілдерімен кездесу өткізді, деп хабарлайды Rail-news.kz.

Кездесу барысында көлік маршруттары мен инфрақұрылымды дамыту мәселелері талқыланды.

Тараптар Сиань қаласы Қытайдың ең ірі көлік-логистикалық хабы екенін атап өтті. Оның аумағында «Сиань халықаралық сауда-логистикалық паркі» халықаралық құрғақ порты орналасқан. Осы құрғақ портқа жүктердің 40% Қазақстан тарапынан келеді, сондай-ақ мұнда ҚХР-ЕО қатынасымен жөнелтілген контейнерлік пойыздардың жалпы көлемінен контейнерлердің 30% қалыптастырылады.

Кездесу қорытындысы бойынша келісімге қол қойылып, соған сәйкес Қытай тарапы Сиань қаласындағы Құрғақ порт аумағында терминал салу үшін 8 гектар жер учаскесін беретін болады. Сиань қаласының мэриясы «ҚТЖ» ҰК» АҚ-ға жаңа логистикалық жобаны іске асыру бойынша қолдау көрсетуге дайын екендігін растады.