Жанары нұрға, құшағы гүлге толы...

Көктемнің шуақты күндерімен қатар келіп, әлемді жылылық пен әдемілікке бөлейтін сәнді де сұлу мереке келді. «Қазақстан темір жолы» ұлттық компаниясында еңбек ететін жүз мыңнан астам адамның 26 мыңын нәзік жан иелері құрайды.

Жылда компанияның ер азаматтар қауымы осы ару қыз-келіншектерге төл мерекеге орай түрлі сый-сияпат жасауды дәстүрге айналдырған. Биыл да наурыз айы туғаннан мерекелік шаралар басталып, құшақтары гүлге, жанарлары нұрға толған әйел заты көктемдей құлпырып айналаның сәнін кіргізді. Теміржол саласында ер адамдармен жауапкершілікті теңдей арқалаған әйелдердің екі мыңға жуық әйел затының 7 мыңға жуығы қарапайым жұмысшы маман. Соның ішінде 35 әйел «Құрметті теміржолшы» төсбелгісімен марапатталған. Жылдағы қалыптасқан дәстүр бойынша компанияның ер азаматтары 7 наурыз күні таңертеңгілік әйелдерді гүлмен қарсы алып, мәжіліс залында оларға арнап концерттік бағдарлама ұйымдастырмақ. Биыл қыз-келіншектерге мерекеге орай 8 АЕК көлемінде сыйақы берілді.  

6 наурызда «Нұрлы жол» вокзал кешенінде өткен нәзік жан иелерінің «Гүлдер-ай» конкурсы түрлі спорттық және өнер сайыстарына ұласты. 7 наурызда өтетін салтанатты шарада «Темір жол – менің тағдырым» конкурсының жеңімпаздары марапатталады деп күтілуде. Жолаушыларға да мерекелік көңіл күй сыйлау ұмыт қалмады. Вокзалдың күту залында отырған әйелдерге гүл сыйлаған жігіттер қауымы ана туралы әннің ырғағында оларды биге шақырды. Арқалық, Шымкент, Семей, Өскеменге жол жүруге пойыз күтіп отырған жолаушылар бұл ерекше құттықтауға аса риза болып, ана туралы жырды қосыла шырқады...