Арулар құрметке бөленген күн
Маңғыстау облысы бойынша меншікті тілші
Бір қолымен бесікті, екіншісімен әлемді тербететін қыз-келіншектер мерекесінде маңғыстаулық теміржолшы аруларға құрмет пен қошемет көрсетілді. Қыз-келіншектерді құрметтеуді әр мекеме әртүрлі атап өтті, дегенмен басты салтанатты шара Маңғыстау қосалқы бөлімінің ғимаратында болды.
Қосалқы бөлім басшысы Нәжімеден Ғұбашов пен бөлім бойынша кәсіподақ ұйымының төрағасы Әзірбай Тұрмағанбетовтің, басқа да басшылық құрамдағы ер азаматтардың қатысуымен мерекелік марапаттау рәсімі ұйымдастырылды.
Көңілді кеште нәзік жандарға арналған ақ тілектер тізгіні ағытылды. Олардың осынау машақаты мол мамандықты ерлермен бір сапта тұрып алып жүрген батылдығы мен батырлығына алғыс айтылды. Үйдің де, түздің де сәнін келтіріп, ортасында өз еңбегімен көрініп жүрген бірқатар қыз-келіншек марапатталып, гүл мен естелік сыйлықтар да табысталды.
