ҚТЖ-да еңбекті қорғау саласындағы қызметкерлер марапатталды
«ҚТЖ» ҰК» АҚ – «Магистральдық желі дирекциясы» филиалында Дүниежүзілік еңбекті қорғау күніне арналған кеңес өтті, деп хабарлайды Rail-news.kz.
Жыл сайын өткізілетін іс-шара «Қауіпсіз және қуатты орта – еңбек саласындағы негізгі қағидат және құқық» ұранымен болып өтті. Еңбек қауіпсіздігі және еңбекті қорғау, өнеркәсіптік қауіпсіздік және экология қызметтерінің, басқа құрылымдық бөлімшелердің және филиалдың кәсіподақ комитетінің басшылары мен қызметкерлері жиналды.
Халықаралық еңбек ұйымы қауіпсіз өндірістік ортаны қалыптастыру проблемасын қызметкерлер құқықтарының негізгі қағидаттарының тізбесіне енгізді.
Магистральдық желі дирекциясының Бас инженері Қайырбай Орынбаевтың айтуынша, филиалда қызметкерлерге қауіпсіз еңбек пен санитарлық-гигиеналық жағдайларды жасау бойынша жүйелі негізде шаралар қабылдануда. Дирекцияның осы мақсаттарға жыл сайынғы шығыстары 6 млрд. теңгеден асады.
Әлеуметтік-тұрмыстық жағдайларды жақсарту, еңбекті ұйымдастыруды арттыру бағдарламасы шеңберінде 2022 жылы тораптық станцияларда 100 астам өндірістік ғимараттар мен санитарлық-тұрмыстық үй-жайлар жөнделіп, жол шаруашылығы және электрмен жабдықтау қызметкерлерінің тұруы үшін 74 модульдік ғимарат орнатылды. Қол еңбегінің көлемін азайту үшін шағын механикаландыру құралдары да сатып алынды.
Ағымдағы жылы 357 өндірістік ғимаратқа ағымдағы жөндеу, сондай-ақ жол монтерлері үшін контейнерлерді жылыту пункттеріне қайта жабдықтау және олардың тұруы үшін 245 модульдік ғимарат сатып алу жұмыстары жүргізілуде. Жұмыскерлерді жұмыс орнына және кері жеткізу үшін, сондай-ақ шағын механикаландыру құралдары мен құрылғыларды тасымалдау үшін 409 бірлік автокөлік сатып алу жоспарлануда.
Кеңес соңында қауіпсіз еңбек жағдайларын қамтамасыз етуге және жасауға белсенді қатысқан қызметкерлер басшылықтың алғыс хаттарымен марапатталды.