Тынышбаевтануға қосылған үлес
12 мамыр қазақтан шыққан тұңғыш теміржол инженері Мұхаметжан Тынышбаевтың туған күні. Осыған орай Шымкент көлік колледжінде ғылыми-конференция өтті.
Колледж директорының тәрбие ісі жөніндегі орынбасары Бәйдібек Атамқұловтың айтуынша, конференцияның мақсаты – «Алашорда» үкіметінің құрылуына өлшеусіз үлес қосқан және жетекшілерінің бірі болған қоғам қайраткерінің өмірі мен қызметі және шығармашылығы жайлы оқытушылдардың арнайы әзірлеген баяндамалары мен зерттеу еңбектерін тыңдап, болашақ теміржолшыларға ұлы тұлғаны тереңірек таныстыру.
Конференцияда М.Тынышбаевтың кәсіби теміржолшы ретіндегі қызметі туралы «Қазақтан шыққан тұңғыш теміржолшы» тақырыбында Гүлжанат Омарбекова, қоғамдық қызметі жайлы «Даланың жарық жұлдызы» тақырыбында Жадыра Тұйғынбаева, «М.Тынышбаевтың тарихи зерттеулері» тақырыбында Ақжарқын Алдабекова, «М.Тынышбаевтың нақыл сөздері» тақырыбында Гүлзат Утесинова, т.б. ұстаздар баяндама жасап, студенттерге тынышпаевтанудан дәріс өткізді.
Теміржол көлігінде тасымалдауды ұйымдастыру және қозғалысты басқару, Автоматика мен телемеханика, Радиотехника, электромеханика және телекоммуникациялар, Темір жол құрылысы, жол және жол шаруашылығы, Логистика, Вагондар мен рефрижераторлы жылжымалы құрамды пайдалану, Жөндеу және техникалық қызмет көрсету сияқты 7 мамандықта болашақ теміржолшыларды дайындайтын оқу орнында бүгінде 771 студент білім алады. Олардың 467-сі мемлекеттік грант негізінде оқиды. Жыл сайын түлектердің 75%-ын жұмыспен қамтыса, 25%-ы Академияда оқуын жалғастырады екен.
Колледж Оңтүстік өңірде орналасқан теміржол мекемелерімен студенттер өндірісте тәжірибеден өтуге келісімшарт жасасқан. Аталған 7 мамандыққа қосымша машинист көмекшісі мамандарын дайындайтын қысқа мерзімді курс та бар.
