Теміржолшылар тиімді коммуникация дағдыларын үйренді

Қызылорда теміржолының мәжіліс залында өткен екі күндік «Білім экспресі» тренингі «Стреске төзімділік», «Тиімді коммуникация», «Кикілжіңді басқару», «Клиент және сервис» тақырыбында өрбіді.

Тренинг тақырыбы айтып тұрғандай, қызметкерлерді түрлі психологиялық күйзеліске қарсы тұра білуге үйретіп, психологиялық дайындықтан өткізуді мақсат тұтқан іс-шараны Ұлттық компанияда арнайы дайындықтан өткен Алма Сәулебаева, Бекзат Кәрімханов, Гүлжан Кішкентаева және Меруерт Жұмаханова сынды ішкі тренерлер жүргізді.

Тренинг «психологиялық күйзеліс» сөзіне сараптама жасаудан басталып, оның «күйзелу, абыржу, мөлшерден тыс ширығып стреске түсу» мағынасын білдіріп, жалпылама тілмен айтқанда адамның ерекше көңіл-күйін бейнелеп, «Стресс» сөзін алғаш рет ХХ ғасырдың 60 жылдары «бейімделудің жалпы синдромы» деген ұғымға теңеген, канадалық дәрігер Селье Ганс енгізгеніне дейін сөз болды. Және осындай күйзеліске түскен адамның одан арылу жолдары да нақты дәлелдермен көрсетілді. Тақырыпты терең меңгерумен қатар, оны аудитория ұғымына қарапайым тілмен, нақты мысалдармен дәлме-дәл жеткізе білген Бекзат Кәрімханов қызылордалық теміржолшылар алдында өзінің шеберлігін көрсете білді. Түрлі ситуацияға қатысты бейнероликтер көрсетіліп, ол қызу талқыланып жатты.  

– Мен «ҚТЖ» компаниясының сертификатталған ішкі жаттықтырушысы болып қызмет атқарамын, негізгі қызмет орным – Семей ЖТ бөлімшесінің өндірістік қауіпсіздік және экология бөлімінде еңбек қорғау және техникалық қауіпсіздік жөніндегі жетекші инженерімін. Жаттықтырушы болғанға дейін бірнеше рет конкурстық сараптамадан өтіп, рұқсат алдым. Бүгінгі тернингке қызылордалық теміржолшылардың басшысынан бастап қосшысына дейін белсенді қатысуда. Керек жерінде ситуациялық сауалдар беріп, оның шешімін бірге іздестіріп, тренинг қызықты өтуде. Жалпы аймақ теміржолшылары мейлінше ашық, тренингке қатысты кез-келген сауалға белсенді араласып, өз ойларын еркін жеткізетінін байқап риза болып отырмын. Бүгінгі тренинг алдағы күндерде оң нәтиже беріп, пайдасын тигізеді деген ойдамын, – деді Бекзат Кәрімханов.  

Екі күндік оқу барысында күйзеліске тап болудың сан түрлі жолдары сөз болып, стресс белгілері, оның себептері, стрестің «эустресс» және «дистресс» түрі деген не, күйзеліс сатылары, одан шығу жолдары, стреске не душар етуі мүмкін, стрестің алдын алу үшін не істеу қажет, тағысын тағы түрлі сауалдарға жауап іздеген жиын болды. Ара-тұра күйзелісті жеңуге жетелейтін жаттығулар да жасалып отырды.  

Тыңдаушылар да тренингтің қызықты өткізілгенін қоштады. Стрестен құтылу үшін дене жаттығуын жасау, серуен, психологиялық, ароматерапия, денені тынықтыру, өз-өзін кез-келген жағдайда ұстай білу, салқынқандылық таныту, жалпы кез-келген күйзеліске себеп болатын жағдайды оңтайлы шешу адам бойындағы күйзелістен арылудың алғашқы қадамы екенін ұғынудың өзі үлкен көмек болғаны анық. Ал бұл дегеніміз – жетістікке жетелейтін жол болмақ.