Теміржол әскерилері 12 ұрлықтың жолын кесті
Тараз қаласы бойынша меншікті тілші
«Әскерилендірілген темір жол күзеті» ЖШС Тараз филиалы Жамбыл бөлімшесіне қарасты мың шақырымнан астам болат жолдың аумағына қызмет көрсетеді. Теміржол нысандарындағы күзетті ұйымдастырып, тасымалданатын жүктердің қауіпсіздігін назарда ұстап отырған теміржолдың әскерилері алғашқы тоқсанда 12 ұрлықтың жолын кескен.
Филиалдың Тараз, Түрксіб, Шу, Сарышаған станцияларында орналасқан 4 атқыштар командасына нағыз тайдың тасындай жігіттер іріктелген. Сондай-ақ Тараз, Шу, Түрксіб станцияларпында Шұғыл әрекет ететін оңтайлы топтар да ұйымдастырылып отыр.
– Біздің басты мақсатымыз – тасымалдағы миллиондаған тонна жүктерді діттеген жеріне жеткізіп, қауіпсіз сақталуын қамтамасыз ету үшін әскерилендірілген күзетпен қамтамасыз ету. Жол бойындағы тәртіп бұзушылық, ұрлық-қарлықты қадағалап, бақылайтын сарбаздарымыз арнайы техникалар мен қару-жарақпен қамтамасыз етілген. Осы жылдың бірінші тоқсанында барлығы 5261 жүк құрамы қабылданып, оның ішінде 3090 жүк пойызы және локомотивсіз тасталған 1070 пойыз толықтай күзетпен қамтамасыз етілді. Темір жолдағы ұрлықтың алдын алу бойынша жүргізілген жүйелі жұмыстың нәтижесінде 2022 жылдың сәйкес мерзімі көрсеткішімен салыстырғанда ұрлық күдігімен ұсталғандардың саны отыз пайызға көбейген. Шұғыл әрекет ететін топтың күшімен бірінші тоқсанда 12 ұрлықтың беті ашылып, 13 азамат желілік полиция бөліміне жеткізілді, – дейді Тараз филиалының директоры Еркін Мүсілімов.
Күзет қызметінің жұмысы тіпті де оңай емес, сарбаздар кейде төтенше оқиғалармен бетпе-бет келіп жатады. Ақпан айында таңертең 5.30-да күзетшілік міндетін атқарып тұрған Түрксіб атқыштар командасының күзетшісі Е.Нышанбаев станциядағы жинақтау паркінің 25-ші жолында екі адамның сұлбасын байқап қалады. Күзетшінің көзіне іліккенін білген екеу жедел мемлекеттік нөмірі «KZ 134 UUA» жеке БМВ автокөлігіне мініп, қаша жөнеледі. Ізіне түскен күзетші Түрксіб станциясы, Степная көшесі 8 үй тұрғыны, 1998 жылы туған күдіктіні құрықтайды. Ол №29509890 вагонының бекіту пломбалау құрылғысын үзіп үлгергені белгілі болды,
Жалпы, осы аралықта Шұғыл әрекет ету тобы ұрлықтың алдын алу бойынша болат жолдың бойында 70 іс-шара ұйымдастырып, жүк пойызына 22 рет жасырын бақылау жүргізіпті. Соның нәтижесінде 66 азаматқа темір жол бойындағы ережені бұзған үшін ескерту жасалған.
– Біз әрдайым жаяу жүргіншілерге болат жолдың бойы қауіпті аймақ екенін ескертумен келеміз. Өз өміріне бей-жай қарайтын тұрғындар, өкінішке орай, азаймай отыр, – дейді Еркін Түгелбайұлы.