Баку жазғы энергетикалық мектебінің халықаралық өкілдері Құрық портына келді
"Total Energy Summer School" жазғы энергетика мектебінің халықаралық делегациясы бүгін теңіз жолы арқылы Маңғыстау облысына келді, деп хабарлайды Rail-news.kz порттың баспасөз қызметіне сілтеме жасап.
Құрық портына ат басын тіреген қонақтарды Қарақия ауданының әкімі Сымбат Төретаев, Әзербайжан мемлекетінің Ақтау қаласындағы бас консулдығы басшысы Эльчин Башироглы Мамедов, Порт басшылығы мен Ассамблея өкілдері қарсы алды.
– Жоба құрамында әлемнің 14 елінен 67 қатысушы бар. Атап айтсақ, Турция, АҚШ, Ұлы Британия, Италия, Испания, Венгрия, Болгария, Жапония, Қазақстан, Сауд Арабиясы және Нигерия өкілдері бар. Олар Ақтау қаласында өтетін форумға қатысады, – дейді Ақтаудағы Әзербайжан елшісі.
Айтуынша, Баку энергетикалық жазғы мектебі – халықаралық дәрежеде тәжірибе алмасу бағытында биыл 17- рет ұйымдастырылып отыр. Қонақтар 3 күн бойы Ақтау қаласында болып, Маңғыстау өңірінің энергетика саласындағы əлеуетті мүмкіндіктерін бағамдап, мұнай және мұнай өнімдерін өндіру бойынша ақпарат-деректермен танысып, өзара тәжірибе алмасады.
Әр елдің өкілдерінен құралған қонақтарға Қарақия аудандық Мәдениет үйінің қызметкерлері ән-күйден шашу шашып, ақ дәм ұсынды.
– Қазақ елі өте қонақжай халық екен. Ұлттық киімдері, домбырасы сондай керемет. Жылы жүзбен қарсы алып жатқан маңғыстаулықтарға, жергілікті ауданға, елшілікке рахмет!, – дейді Әзербайжан "Ада" университетінің дипломатия және даму бойынша жоба жетекшісі Наргиз Исмаилова.