Аптап ыстықтан созылған рельстер ауыстырылып жатыр
Ақтөбе облысы бойынша меншікті тілші
Ақтөбеде қазір ауа температурасы 40-50 градус аралығында. Ақтөбе жол дистанциясының жолшылары аптап ыстықта жол күтімін жасап, созылған рельстерді ауыстыру жұмыстарын жүргізіп жатыр.
Кеше Ақтөбе станциясы аумағындағы алтыншы бағдаршам тұсында аптап ыстықтан созылған рельсті ауыстыру жұмысы жүрді. Апаттық жағдай мен оқыс оқиғаның орын алуына жол бермеу үшін жолшылар уақытпен санаспай жұмыс істеуге мәжбүр.
«Күні бойы жол бойында жүреміз. Жоқ дегенде 10 шақырым жолды тексеріп шығамыз, мынадай аптап ыстықта рельс созылып, қысым пайда болып, лақтырып жіберуі мүмкін. Сынған, көтерілген, ағытылған, жарылған жерлердің жоқтығына көз жеткіземіз», – дейді Ақтөбе жол дистанциясы алтыншы айналымының бригадирі Сайран Бақбергенов.
Аптап ыстықта жүрісі көбейетін жолшылар осылай, өздеріне бекітілген аумақты күніне екі рет шолып шығады екен. Одан бөлек, жоспарға сай жазғы жол сауықтыру жұмыстары да жүріп жатыр.
Ақтөбе жол дистанциясының жетекші инженері Асхат Құрманаевтың айтуынша, 15-21 маусым аралығында жол табанын тазарту, қалыпқа келтіру жұмыстары жасалған. Сонымен қатар, 9 жинақ ағаш бұрмалар темір бетонға ауыстырылыпты. РМ, ДУАМАТ техникаларымен 4 шақырымда жазғы жол сауықтыру жұмыстары жүргізілген. Бұл бағыттағы жұмыстар әлі де жалғасуда. Әрине, ертеңнен кешке дейін далада, ыстық күн астында жүретін жолшылар қорғаныш құралдарымен қаруланған, сақтық шараларын ұстануда.