TRANSLOGISTICA KAZAKHSTAN көрмесі өтеді
«Қазақстан теміржолшысы» газетінің тілшісі
Астанада дәстүрлі «Көлік және Логистика» көрмесі өтеді. 26-шы TransLogistica Kazakhstan 2023 халықаралық көрмесі 4-6 қазан аралығында «EXPO» ХКО-да ұйымдастырылмақ.
TransLogistica Kazakhstan – Орталық Азиядағы көлік-логистикалық қызметтер мен технологиялардың ең ірі көрмесі, маңыздылығы мен келушілер саны бойынша ТМД елдері мен Балтық жағалауы елдерінде TransRussia-дан кейінгі екінші көрме. Алғаш рет 1996 жылы өткізілгелі бері бұл жоба көлік, логистика, машина жасау және аралас салаларда жұмыс істейтін мамандар үшін маңызды іс-шараға айналды.
TransLogistica Kazakhstan мамандарға экспедиторлық компаниялармен және жеке жүк автокөліктері паркінің, контейнерлердің, вагондардың, теңіз және әуе кемелерінің, терминалдардың, қоймалардың және порт инфрақұрылымының иелерімен тікелей байланыс арқылы кез келген коммерциялық жүктерді жеткізуді оңтайландыруға, сондай-ақ көліктік-логистикалық тізбекті құру үшін сенімді серіктестерді табуға және тиімді шарттармен ынтымақтастық туралы келісімге мүмкіндік береді. Жыл сайын TransLogistica Kazakhstan көліктік-экспедиторлық қызмет көрсетуден бастап жүктерді сақтау мен өңдеуге арналған бағдарламалық қамтылым мен жабдықтарға дейінгі салалық шешімдердің толық кешенін көрсетеді.
Көрмеге қатысушылар қатарында Қазақстан мен шетелдің теңіз порттарының, темір жолдары мен арнайы экономикалық аймақтарының әкімшіліктері, логистикалық компаниялар, автотехника өндірушілері мен дилерлері, вагон жасау және жөндеу зауыттары, логистикалық орталықтарды жабдықтауға арналған жабдықтарды жеткізушілер, қойма жабдықтарын өндірушілер, жүктерді өңдеу мен қоймалауға арналған компаниялар бар.
Бүгінгі таңда биылғы көрмеге қатысуға 15 елден 200 компания ұсыныс берді. Олардың қатарында Әзірбайжан, Беларусь, Германия, Қазақстан, Қытай, Қырғызстан, Литва, Латвия, Польша, Ресей, Түрікменстан, Түркия, Өзбекстан, Финляндия және Эстония бар.