Суды үнемдеуге арналған акция өтті
«Қазақстан теміржолшысы» газетінің тілшісі
Осы жылдың тамыз айында «ҚТЖ» ҰК» АҚ – «Магистральдық желі дирекциясы» филиалдары мен құрылымдық бөлімшелерінде «Тіршілік тамшы судан басталады» атты акция өтті.
Акция мақсаты – қоршаған ортаны қорғау проблемаларына экологиялық көзқарасты қалыптастыру, сондай-ақ су ресурстарын сақтауға және ұтымды пайдалануға бағытталған іс-шараларды жүзеге асыру. Осыған орай темір жол қызметкерлерінің назарын суға ұқыптылықпен қарауға салып, жұмыс орнында, үйде үнемділік ережелерін сақтауға қатысты қарапайым кеңестер айтылды.
«Су – тіршілік көзі. Сондықтан әрбір адам үйдегі суды үнемдеу арқылы планетаны сақтауға үлес қоса алады. Оған Жаңа-Семей жол дистанциясы жолшылары мен Ақтөбе белгі беру және байланыс дистанциясы қызметкерлерінің суды үнемдеудің қарапайым тәсілін тауып отырғаны жарқын мысал бола алады. Мәселен, сіздің дәретхананың су жіберетін күбішесі екі режиммен жабдықталмаған болса, онда артық су кетірмеудің қарапайым тәсілі мынадай: яғни екі литрлік пластикалық бөтелкені суға толтырып, күбішеге салып қоясыз. Бұндай тәсіл күніне 20 литрге дейін таза суды үнемдеуге көмектеседі», – дейді Дирекцияның экологиялық қауіпсіздік бөлімінің бастығы Айгүл Иримбетова.
Маман сөзіне қарағанда, Дирекцияға қарасты құрылымдық бөлімшелер мен өңірдегі филиалдардың қызметкерлері «Тіршілік тамшы судан басталады» акциясына белсенді қатысқан. Бір қарағанда, қарапайым кішкентай ғана дүние болып көрінері анық. Алайда, бұл ғадет адам бойына сіңісіп кетсе, жаһандық проблеманы шешуге көмектесетін өзгерістер бастауы екені сөзсіз. Суды үнемдей отырып, планетаны, қоршаған ортаны, тіршілік атаулыны қорғауға атсалыңыз. Бұл – әрбір адамның азаматтық парызы.