Жолаушы вокзал қызметкерлеріне алғыс айтты

Қазақстан темір жолының қызметін пайдаланған жолаушы вокзал қызметкерлеріне алғыс айтты. Қарапайым қызметін үлкен ілтипатпен жасап, ең алдымен адамгершілік танытқан теміржолшы қауымға риза болған азамат алғысын әлеуметтік желіге жүктеген.

Ақтөбе теміржол вокзалына жолы түскен жолаушы пойыздан түскен соң қан қысымы көтеріліп, жағдайы күрт нашарлап кеткенін айтады. Вокзал қызметкерлері дереу көмек беріп, сосын қонақ үй тауып беріп, керек жеріне дейін жеткізіп тастаған.  

«Ақтөбе вокзалының сыртында тұрмын. Бұл қалаға жеке шаруаларыммен келген едім. Аздап қан қысымым көтеріліп кетті. Вокзал қызметкерлеріне жағдайымды айтқанда бірден қол ұшын созып, орналасатын қонақ үйге дейін тауып берді. Тіпті қол жүгімді көтерісетін қызметкерін ертіп жіберіп, мені тиісті мекен жайға апара жатыр. Қандай керемет, қызметтеріңізге ризамын», – деген жолаушы видеода қасында келе жатқан теміржолшыны да көрсеткен.  

Желідегі видео астына көпшілік алғыс жаудырып, пікір қалдырды. Жағымды жаңалықты жиі салуды сұрағандар адамгершілік қашан да алдыңғы орында болуы керектігін, қарапайым байланыстарды шынайы жасау керектігін жарыса жазды.  

Ал вокзал басшылығы әрбір жолаушыға қызмет көрсету міндетіміз деді.  

«Вокзал кешені – адам көп шоғырланатын қоғамдық орын. Мұнда барлық нәрсе бақылауда. Жолаушылардың қауіпсіздігі ерекше назарда. Көмек сұраған жолаушыға қажеттінің бәрін жасаймыз», – деді Ақтөбе теміржол вокзалы басшысының міндетін атқарушы Арсен Кенжин.  

Ақтөбе вокзалында жолаушыларға сервистік қызмет көрсету үшін барлық жағдай жасалған. Кез келген ақпарат алу мүмкіндігі қарастырылған. Мүмкіндігі шектеулі жандарға арналған билет кассасы, электронды кезек жүйесі жұмыс жасайды. Төлем терминалдары, пойыздардың жол жүру кестесі, ақпараттық-анықтама тақтасы да бар. 4 асхана, дәріхана, полиция бөлмесі, жүк сақтау қоймасы, күту залы, дүңгіршектер, ақысыз әжетхана бар.