Үлгілі теміржолшыны әріптестері зейнетке шығарып салды
Маңғыстау облысы бойынша меншікті тілші
Маңғыстау теміржолында ер азаматтармен бір сапта қандай қиын жұмыс болса да абыроймен атқарып, табандылықпен еңбек етіп жүрген қыз-келіншектер көп. Солардың бірі – Бейнеу айналым депосының тасымалдау құжаттарын өңдеу операторы Маржан Хайдарова. Салаға 40 жылдан астам ғұмырын сарп еткен оны әріптестері жақында зейнет демалысына құрметпен шығарып салды.
Маржан Тұрғанбайқызы еңбек жолын 1980 жылы радиоторабта монтер ретінде бастап, 1987 жылы ТЧ-15 Бейнеу локомотив депосында тасымалдау құжаттарын өңдеу операторы болып жалғастырады. Депоның барлық сандық, сапалық көрсеткіштерін сарапқа салып, жедел ақпарат беріп отыратын орталықтың жұмысын ә дегеннен-ақ үйіріп алып кететін іскерлігімен де көзге түседі. Бұл бөлімде тәуліктегі машинистердің іс-сапар, ауысымдық жұмыстары, парақтағы тасымалданған жүктің салмағынан бастап, барлық көрсеткіштері жазылған мәліметтер, жөндеу деполарының тепловозды жөндеу туралы мәліметтері беріліп, қорытылатыны белгілі. Осындай жауапты жұмыстарды ұзақ жылдар атқарып келген оның еңбегі қашанда мақтауға тұрарлық дейді әріптестері. Теміржол саласында өткізген 43 жылдың 36 жылын Бейнеу локомотив депосының жұмысын жүргізуге жұмсаған ол осы жылдар ішінде басшылықтан талай алғыс алып, марапаттар иесі болған.
– Маржан ханым туралы тек жақсы жағынан айтуға болады. Жұмысына тиянақты, ұқыпты, жауапкершілігі мол жан. Ұжым арасында сыйлы, білгенін үйретуден шаршамайтын еңбек озаты. Қоғамдық жұмыстарға араласып, жастарға тәлім тәрбие беруде ауқымды жұмыс атқарып келеді. Әрі өзі ұрпақтар сабақтастығын сақтап, отбасылық династияны жалғастырып келе жатқан отбасыдан. Ұлы Жандос Аяғанұлы көмекші машинист, қызы Камшат Хайдарова өзінің қасында тасымалдау құжаттарын өңдеу операторы, – дейді Маңғыстау локомотив депосының кәсіподақ ұйымы төрағасы Әбілсейт Нәбиханов.
