ҚТЖ мемлекеттік тіл саясатын қалай іске асырып жатыр?
«Қазақстан теміржолшысы» газетінің тілшісі
«ҚТЖ» ҰК» АҚ-да биыл мамыр айынан бастап компания басшылығының қолдауымен Мемлекеттік тілді дамыту секторы құрылып, жұмыс істеуде. Еліміздегі мемлекеттік тіл саясатын компанияда іске асыратын бірден бір органның мақсат-міндеттері мен жоспарлары қандай?
Бұған дейін 2001-2002 жылдардан бастап 10 жыл осындай басқарма ҚТЖ-да жұмыс істегені мәлім. 2009 жылы Орталық аппараттағы Тіл басқармасы қысқартылып, мемлекеттік тілге қатысты жұмыстар тоқтап қалған еді. Міне, араға уақыт салып, биылдан бастап қазақ тілінің мәртебесін көтеруге бағытталған жұмыстар қайтадан жандана бастады.
– ҚР Ғылым және жоғары білім министрлігінің хатына сәйкес барлық ұлттық компанияларда мемлекеттік тілді дамыту бойынша басқарма, бөлім, секторлар ашу күн тәртібіне қойылды. Қазіргі таңда 3 адаммен сектор жұмысын жүргізіп жатырмыз. Жалпы сектор міндеті – компанияда тіл саласындағы мемлекеттік саясатты жүргізу. Тілге қатысты мемлекетімізде қабылданған заңдар, нормативтік-құқықтық актілерін, Президенттің жарлықтарын, Үкіметтің қаулыларын іске асыру, – дейді бұл туралы сектор меңгерушісі Ербол Тоқтағазы.
Оның айтуынша, тіл саясатын жүргізу үшін ең бірінші қызметкерлерге мемлекеттік тілді оқыту керек. Одан кейінгі бағыт – насихаттау, мемлекеттік тілдің мәртебесі мен абыройын көтеруге арналған іс-шаралар өткізу, қызметкерлердің тілге деген дұрыс көзқарасын қалыптастыру, сол мақсатта түрлі жиындар ұйымдастыру. Сонымен қатар жалпы күн сайынғы іс-қағаздары мен құжаттарда мемлекеттік тілдің қолданылуын назарда ұстайды. Халыққа қызмет көрсету орындарында теміржолға қатысты ілініп тұратын көрнекі құралдардағы тілдің тазалығын сақтауды қадағалайды. Вокзалдарда анықтамалық ақпарат беретін орындарда мемлекеттік тілдің қолданылуын қамтамасыз етеді. Тіл туралы заңнамаға сәйкес дұрыс жазылуын бақылайды. Осы жұмыстардың нәтижесі бойынша аталған сектор ҚР Тіл комитетіне есеп береді.
Сектор қызметкерлері сондай-ақ темір жол саласында қолданылатын терминдерді біріздендіруді көздеп отыр. Ол үшін терминдер аудармасын мемлекеттік терминологиялық комиссияға ұсынады.