Қытай мультимодалды тасымалға мүдделі
«Қазақстан теміржолшысы» газетінің тілшісі
Бүгінгі таңда Қытай теміржолшылары өзге елдердегі әріптестері және теңіз тасымалдаушыларымен ынтымақтастықта мультимодальды тасымалды дамытуға мүдделі.
New Silk Way VI көлік-логистикалық бизнес форумына қатысқан «Қытай темір жолдары» мемлекеттік корпорациясы бас директорының орынбасары Сун Сюдэ алға тартқан мәліметке сүйенсек, Қытай статистикасы бойынша биыл өткен 8 айда Қытай порттары арқылы Қазақстан мен Орталық Азияның өзге елдеріне бағытталған 49 мың ЖФЭ транзиттік контейнерлер теміржол-теңіз қатынасымен тасымалданған. Бұл өткен жылғы көрсеткіштен 29 пайызға көп.
– Қытай темір жолдары – ұлттық экономиканың күретамыры. Ол елдің кешенді көлік жүйесінде жүйе құраушы рөл атқарады. 2022 жылы теміржолмен 3,9 млрд тонна жүк тасымалданды. Бүгінде Қытай теміржолында 99,3 пайыз қалаларды қамтитын 3644 жүк станциясы бар. Соңғы 10 жылда «Бір жол, бір белдеу» жобасының аясында теңіз бен құрлықты біріктіретін, тармақталған мультимодальды тасымал бағыттарын құрдық, – деді ол өз сөзінде.
Өзге елдермен, соның ішінде Қазақстанмен теміржол бойынша ынтымақтастықты арттыру үшін шекаралық өткелдер инфрақұрылымын дамыту жоспарын бірлесе орындау көзделуде. Қазақстан арқылы мультимодальды тасымалды дамыту үшін Қытай-Еуропа-Қытай бағытында контейнерлік пойыздардың қатынау географиясын ұлғайту ұсынылды. Сол бағытта халықаралық тасымалды цифрландыру, контейнерлік пойыздардың қозғалысын ұйымдастыру сапасын бірге арттыру жоспарда бар. Сонымен қатар Каспий, Қара және Балтық теңіздері арқылы тасымалды қоса алғанда теміржол-теңіз тасымалы бойынша халықаралық ынтымақтастықты тереңдете түсуге басымдық беріледі.