Ерекше қажеттілігі бар жолаушыларды тасымалдау көлемі 64%-ға артып отыр
Осы жылдың 8 айында ерекше қажеттіліктері бар 367 мыңнан астам жолаушы «Жолаушылар тасымалы» АҚ пойыздарымен тасымалданды, деп хабарлайды Rail-news.kz.
Бұл көрсеткіш өткен жылдың сәйкес кезеңімен салыстырғанда 64 пайызға артық. Жалпы 44 теміржол маршрутының құрамында әртүрлі бағыттар бойынша 100 бірлік мамандандырылған купе вагондары (20 –«Тальго», оның ішінде алтауы арнайы көтергіштермен, 80 – стандартқа сай вагондар, оның ішінде 16 бірлігі көтергіштермен жабдықталған) өңірлерге қатынайды, олар мүмкіндігі шектеулі жандарға арнайы сәйкестендірілген (екі орындық купесі бар вагон: ерекше қажеттілігі бар тұлғалар мен ілесіп жүретін адамға арналған жабдықталған орын).
Облысаралық қатынастар бойынша жүретін пойыздардың барлық құрамында (57 маршруттағы 122 құрам) мүгедектерге арналған арбалар бар.
Бүгінгі таңда «Жолаушылар тасымалы» АҚ паркі отандық «ЗИКСТО» компаниясы жасап шығарған жаңа 50 жолаушылар вагонымен толықтырылды. Оның ішінде, мүмкіндігі шектеулі жандарға арналған көтергіштермен және тұтқалармен жабдықталған 4 арнайы вагон бар.
Жолаушылар тасымалына арналған жылжымалы құрамның паркі 2 567 бірлікті құрайды.
Вагондардың орташа пайдалану мерзімі – 18 жыл. Пойыздардың ауаны баптау жүйесімен қамтамасыз етілуі 76% құрайды.
Сонымен қатар биыл қыркүйек айында «ЗИКСТО» АҚ отандық өндірушісімен 100 жолаушы вагонын жеткізу бойынша келісімшарт жасалғанын айта кеткен орынды. Аталған құрамда мүмкіндігі шектеулі жандарға арналған жекелеген мамандандырылған вагондар да көзделген. Сондай-ақ келесі жылы қосымша 157 жолаушылар вагонын сатып алу жоспарланып отыр.
Айта кетерлігі, 2025-2030 жылдар аралығында «Штадлер – Қазақстан» ЖШС отандық өндірушісі 537 жолаушылар вагонын жеткізеді деп күтілуде. Оның ішінде ерекше қажеттіліктері бар жолаушылар үшін 35 вагон болады. Жылжымалы құрам паркін жаңарту бойынша барлық жоспарланған іс-шаралардың нәтижесінде 2030 жылы жылжымалы құрамның орташа көрсеткіші 18-ден 13 жылға дейін төмендейді.
Осы ретте жолаушылар пойыздарына билеттерді жеңілдетілген бағамен сатып алу үшін барлық жағдай жасалған. Әлеуметтік маңызы бар маршруттар бойынша барлық мүгедектік топтары үшін 50%, ал «Тұлпар-Тальго» коммерциялық поездарында (мүгедектік орындарына) билет құнынан 70% жеңілдік берілді.
Биыл маусым айынан бастап bilet.railways.kz сайтында мүмкіндігі шектеулі жандар үшін жеңілдетілген бағамен билеттерді онлайн рәсімдеу бойынша жаңа қызмет енгізілді. Бұл билеттерді үйден шықпай-ақ сатып алуға мүмкіндік береді. Бүгінгі таңда аталған қызмет түрін 1500-ге жуық жолаушы пайдаланған.
Естеріңізге сала кетейік, осы жылдың 1 қыркүйегінен бастап ерекше қажеттіліктері бар адамдар үшін теміржол билеттерін онлайн сатып алу рәсімі айтарлықтай жеңілдетілген. Ендігі кезекте 6 таңбалы әлеуметтік идентификатор кодын енгізудің қажеті жоқ. Бар болғаны ЖСН мен мүгедектік туралы анықтама нөмірін енгізу жеткілікті.