Шеберлік сабағында конкурстық комиссия мүшелерінің жауапкершілігі туралы айтылды

«ҚТЖ» ҰК» АҚ Магистральдық желі дирекциясы филиалының бас инженерлер блогы қызметкерлеріне арналған шеберлік сабағы өтті. Қызметкерлер сабаққа онлайн да, қашықтан зум арқылы да қатысуға мүмкіндік алды.  

Шеберлік сабағының тақырыбы «Конкурстық комиссия үміткерлерімен әңгімелесу жүргізу тәртібі» деп аталды. Компанияның Адами ресурстарды басқару департаментінің HR бизнес серіктесі Динара Сәрсембаева мен бас менеджері Дархан Төкенов жүргізген жиынға аталған департамент директоры Сәуле Истлеева да қатысты.  

 – Сабақ барысында конкурстық іріктеу кезеңдері, алғышарттары, әңгімелесуді жүргізу форматы, үміткерлер біліктілігін бағалау, конкурстық комиссия мүшелерінің жауапкершілігі туралы айтылды. Сонымен қатар компанияның басқарушылық және корпоративтік біліктілік моделі, біліктілікті анықтау бойынша жобамен қойылатын сұрақтар туралы да сөз болды, – дейді Д.Төкенов.  

Біліктілікті бағалауға арналған сұрақтардың ішінде адамдарды басқару бойынша «Сіз өзіңіздің қарамағыңыздағы қызметкерлермен қандай байланыс орнатасыз?», «Өз қызметкерлеріңіздің алдына қандай мақсаттар мен міндеттер қоясыз?» деген сауалдар болды. Ал сапа мен нәтижеге бағытталған жұмыстар бойынша «Әдетте ауқымды жұмыстарды қалай атқарасыз?», «Қысқа уақыт ішінде қандай жоба немесе іс-шараны қалай ұйымдастырдыңыз?» деген сауалдар қойылатыны айтылды. Сол сияқты командалық жұмыстар, көшбасшылық, ынталандыру, тайм менеджмент бойынша да қабілеттерді анықтауға арналған сұрақтар легі ұсынылды.  

С. Истлеева мұндай оқыту тәжірибесі еліміздегі басқа да ұлттық компанияларда да, мемлекеттік құрылымдарда да бар екенін жеткізді. Сабақ барысында қатысушылар сұрақтар қойып, өзара пікір алмасты.